شەفەق نیوز/ دەسەڵاتەیل هندستان، ئمڕوو جمعە، گشت مەکتەوەیل سەرەتایی لە دلهی پایتەخت بەسان تا بانگەوازیگ ترەک، لەوەڕ بەرزەوبوین ئاست پیسبوین وا لە شارەگە، لەوەختیگ  "تەم دویکەڵین" وە دویری زیاتر لە ١٠٠ میل،  پەیکەر "تاج مەحەل" یەکیگ لە دیارترین سیمایل میژووی لە جەهان شارێدەو.

دانی و ناوچەی شارستانی دەورگردی کە زیاتر لە ٣٠ ملیۆن کەس هاناوی، هەمیشە کەفێدە وەردەم رزبەندی جەهانی لە پیسبوین وا لە زمسان، کە ئەوەیش نزیکەی هەفتە ساڵ لە تەمەن مەردمەگەی کەمەو کەێد، وەگورەی ئاژانس فرانس پرێس.

پیسبوین ژینگە بویەسە سەرچەوەی نەگبەتی ئەرا ئەو کەسەیلە کە لە دلهی داکاسیانە، وەگەرد شکست هەڵمەتەیل جیاجیای حکومەت ئەرا چارەکردن گیچەڵەگە.

دویەکە پەنجشەممە، ئەویشی سینگ خانمە سەرۆک وەزیرەیل دلهی لەبان ماڵپەڕ ئێکس نویسان: لەوەر بەرزەوبوین ئاست پیسبوین، گشت مەکتەوەیل سەرەتایی خوەنەوارییان کەفێدە بان ئەنتەرنێت، با دەرچگن فەرمانیگ ترەک.

ساڵانە قەیران تەم دویکەڵین ژاوەژاو خەێدە شارەگە، لەوانە دیرکەفتن یا وسیان کاروانەیل ئاسمانی و قەتارەیل.

خەسەخانەیل زیابوین شمارەی ئەوانە توومار کرد کە گیچەڵ تەندروسی جویر هەناسەدان دیرن کە پەیوەندی وە پیسبوین دیرێد، کە هاتێ بڕەسێدە قەیرانیگ تەندروسی لە شارەگە.

 حکومەت دویەکە پەنجشەممە، هەمیش قەیەغەی گشت کارەیل بیناسازی نا گرنگ کرد، و داوا لە هاوڵاتیەیل کرد ماشینەیل کەمتر وەکار بارن، و واز لە زوخاڵ و سزانن چوو ئەرا گەرمکردن بارن، 

گلەیی لە ئاست یەکەم خریەێدە مل کشاورزەیل کە پویش سوننە لە ناوچەیلیگ ترەک لە هندستان، ئەرا پاکەوکردن زەوییەیلیان ئەراک جفتکردن، وەگەرد هەڵم کارخانەیل و دویکەڵ ماشینەیل.