شەفەق نیوز - وەدویاچگن

نرخەیل تەڵا زیاتر لە 1% داوەزی، ئمڕوو پەنجشەممە، وەردەوام بوی لە زەردەیلی ئەرا سیەم دانیشتن لەدویای یەک،  وەگەرد بەرزەوبوین مەزەنەیل بەرزەوکردن نرخەیل سوود ئەمریکی دویای دەرچگن زانیارییەیل هەڵاوسان بەهێزتر لە مەزەنە کریا.

تەڵا لە مامەڵەی دەستوەجێ وەبڕ 1.8% داوەزی ئەرا 4083.94 دۆلار ئەرا ئۆنسەیگ، و نزمترین ئاست توومار کرد لە 7 تشرینی یەکەم/ ئۆکتۆبەر، لە وەختیگ گرێبەسەیل ئایندەی ئەمریکی ئەرا تەڵا لە کانوونی یەکەم/ دیسەمبەر وە بڕ 1.7% داوەزی ئەرا 4107.90 دۆلار ئەرا ئۆنسەیگ.

داوەزینەگە  وەگەرد بەرزەوبوین نیشانەیل دۆلار هات وەبڕ 0.5% و بەرزەوبوین خەزینەی ئەمریکی ئەرا ماوەی 10 ساڵ، کە فشار لەبان کانزای زەرد زیای کرد.

زانیارییەیل ئەمریکی دەرخسن  نیشانەی نرخەیل وەکاربەر وە بڕ 0.6% لە مانگ گوزەشتە بەرزەو بۊیە، بەراورد وە زیایبوینی 0.4% لە ئاب/ ئۆگوست، کە مەزەنەیل توونکردن سیاسەت کاش پتەو کرد.

ئەگەرەیل بەرزکردن سوود ئەمریکی لە تشرین یەکەم/ ئۆکتۆبەر بەرزەو بۊ ئەرا 42%، وەرانوەر 22% وەرجە دەرچگن  زانیارییەیل.

کانزا گرانبەهایەیل ترەکیش داوەزیان وەخوەیان دین، نوقرە وە بڕ 6.6% داوەزی ئەرا 55.53 دۆلار ئەرا ئۆنسەیگ، و پلاتین وەبڕ 3.5% ئەرا 1605.37 دۆلار، و پالادیۆم وەبڕ 2.8% ئەرا 1094.50 دۆلار ئەرا هەر ئۆنسەیگ.