شەفەق نیوز - وەدویاچگن
نرخەیل نەفت، ئمڕوو سێشەممە، داوەزیان، لەناو مەزەنەیل زیایبوین خستنەڕوی جەهانی و گەشەوبوین هەناردەیل خوەرهەڵات ناوڕاس، کە زاڵ بویە وەبان نیگەرانییەیل وەردەوامبوین پەلامارەیل ئەرا بان کەشتییە نەفتکیشەیل و ژێرخان وزە لە ناوچەی کەنداو.
گرێبەسەیل ئایندەی نەفت خام برێنت 44 سەنت، یا ئەوەگ یەکسانە وە 0.5% داوەزیا، تا 92 دۆلار ئەرا هەر بەرمیلیگ توومار بکەێد، لە وەختیگ نەفت خام خوەرئاوای تەکساس ناوڕاس ئەمریکی وە هەمان بڕ داوەزیا ئەرا 85.28 دۆلار ئەرا هەر بەرمیلیگ.
شیکەرەوەیل وتن: داوەزیان نرخەیل رەنگدان زیایبوین قەناعەت بازاڕەیلە وە ئەوەگ خسنەڕووی نەفت دەسوەپیکردگە رەسێدە داواکاری، و شایەت لەلیش رەد بوود، لە ئاڵشتبوینیگ فرەیی دابینکردنەیل گلەو دەێد ئەرا مدوو کاریگەرەیل لە بازاڕ.
ئاژانس وزەی ناودەوڵەتی مەزەنەی گلەوخواردن بازاڕ نەفت جەهانی کردوید ئەرا توومارکردن فرەیی لە خسنەڕوو لە ماوەی چارەک کۆتایی ئمساڵ، وەگەرد خاسەوبوین هەناردەیل خوەرهەڵات ناوڕاس وە خێراییگ زویتر لە ئەوزەڵکردن داواکاری جەهانی.
وەگەرد ئەوەیش، هیمان پەلامارەیل ئەرا بان دامەزراوەیل هاز و جویڵەی بارکردن لە کەنداو و گەروو هورمز سەرچەوەی نیگەرانین ئەرا بازاڕەیل، باوجی پاداشت ریسکە جیۆسیاسییەیل دەسوەپیکردیە وە داوەزیان وەگەرد خاسەوبوین دابینکردنەیل.
لە باوەتیگ پەیوەنیدار، ئەمارەیل نەفت خام لە یەدەگ نەفت ستراتیژی ئەمریکی داوەزیا ئەرا 276.4 ملیۆن بەرمیل، کە نزمترین ئاستە لە ئاب/ ئۆگەست 1982ـەو، وەپای داتایەیل وەزارەت وزەی ئەمریکا.