شەفەق نیوز - وەدویاچگن

نرخەیل نەفت، ئمڕوو سێشەممە، داوەزیا وەگەرد کەمەوبوین رخدارییەیل لەبان دابینکردن وە مدوو جویلەیل دیپلۆماسی ئەرا کپەوکردن جەنگ ئەمریکی و ئیسرائیلی لەبان ئیران، باوجی پەلامارەیل لەبان سعودییە و وەردەوامبوین گرژییەیل لە تەنگەی هورمز نواگیری کرد لە زەرد نرخەیل.

 گرێبەسەیل ئایندەی خام برێنت 66 سەنت، یا 0.57٪، داوەزی ئەرا 115.15 دۆلار ئەرا هەر بەرمیل، لە وەختیگ خام خوەرئاوای تێکساسی ئەمریکی 44 سەنت، یا 0.43٪، داوەزی ئەرا 101.32 دۆلار ئەرا هەر بەرمیل.

داوەزیانەگە لە دویای دانیشتنەیلیگ هات کە سعودییە و تورکیا و پاکستان وەگەرد وەرپرسەیل ئیرانی لە تەهران ئەنجامی دان، رووژدوشەممە، وە ئامانج کەمکردن گرژییەیل و وازکردن رێگەیل دانوسانن ئەرا نواگیری لە ئاڵۆزی سەربازی، وەگەرد رێککەفتن لایەنەیل لەبان وەردەوامبوین دانیشتنەیل ئەرا قایمکردن هاوکاری لە دو مژار ئاشتی و ئاسایش.

باوجی ئومێدەیل ئارامەوبوین کەمەوبویە، وەگەرد دەسوەپیکردن پەلامارەیل لەبان سعودییە، لە وەختیگ تشرین یەکەم گەورەترین شمارەی پەلامارەیل لەبان کەشتییەیل بازرگانی لە تەنگەی هورمز و رێگەیل ئاوی هاوسا توومار کرد لە دەسوەپیکردن روانگەیکردن ئی رویداوەیلە لە ساڵ 2017.

 خام برێنت لە هەفتەی گوزەشتە لەبان 117 دۆلار ئەرا بەرمیل ڕەد بوی، کە بەرزترین ئاست لە نیسان توومار کرد، لە ناوڕاس رخداری لە پەککەفتن دابینکردن لە ئەنجام پەلامارەیل ئیرانی لەبان کەشتییەیل نەفت لە نزیک تەنگەگە، کە نزیکەی پەنج یەگ لە دابینکردن وزەی جیهانی لەناویەوە رەد بوی وەرجە دەسوەپیکردن جەنگ لە مانگ شوبات.