شەفەق نیوز/ جۆ بایدن سەرۆک ئەمریکا دووپات کرد ک ئەرک جەنگی هیزەیل ئەمریکا لەناو هاوپەیمان ناودەوڵەتی دژوە ریخریاگ داعش لە عراق تەواو بوی.
ئەوەیش لە وتاریگ "واشینتۆن پۆست" بڵاوی کرد، لەناوی باس چەن باوەتیگ کرد، لەلیان ئەو سردانیە ک بڕیارە رووژ جمعەی ئایندە ئەرا سعودیە ئەنجامی بەێد، و باوەت ئەتۆمی ئیران، وەگەرد قەیران فەلەستین و یەمەن و سوریا و لوبنان و عراق و لیبیا.
بایدن ئویشێد: ئەو خوەرهەڵات ناوڕاسە ک وەرجە ١٨ مانگ بویە میراتی ئیدارەگەی ئیسە ئارامترە، و باس ئەو پەلامار مووشەکیە لەبان باڵیۆزخانەی ئەمریکا لە بەغداد کرد ک وەرجە مانگیگ لە وەرگردن پۆست سەرۆک ئەمریکا بوی.
وتیش: ئەرک جەنگی ئەمریکا کۆتایی وەپی هاوریا و سەربازی ئەمریکا لە عراق ئەرا راهێنان عراقیەیل مەنیە، وەگەرد مقەیەتیکردن ئەرک هاوپەیمان دژوە ریخریاگ داعش.
بایدن وتیش: هیمان ناوچەگە پڕە لە سەختی، لەلیان: بەرنامەی ئەتۆمی ئیران، جەنگ سوریا، قەیران ئاسایش خوەراک، کۆمەڵە چەکدارەیل لە چەن دەوڵەتیگ، هشکی سیاسەت لە عراق و لیبیا و لوبنان، باوەتەیل ماف مرۆڤ، وتیش: بایەتە ئەرک گشت ئی باوەتەیلە هەڵگریمن.