شەفەق نیوز/ باڵە چەکدارەیل لە سوریا، شەوەکی ئمڕوو یەکشەممە، راگەیانن کە بەشار ئەسەد سەرۆک سوریا لە وڵاتەگە دەرچگ.
لە پەیامیگ لەبان ئەپلیکەیشن تیلیگرام راگەیانن کە بە کۆتایی سەردەم تاریکیە و سەرەتای سەردەمیگ نووە ئەرا سوریا.
وەرجەیە، روانگەی ماف مرۆڤ سوریا، و ئاژانس رۆیتەرز راگەیانن کە ئەسەد لە وڵاتەگە دەرچگ وەرەو شوین نادیاریگ.
رامی عەبدوڕەحمان قسەکەر روانگەی سوری ئەرا ئاژانس خەوەری ئەسوشیتد پرێس وت: ئەسەد لە وەها زوییگ وەگەرد شەفەق ئمڕوو یەکشەممە سوار فڕۆکە بوی.
ئی قسە دویای ئەوە هات کە باڵە چەکدارەیل رسینیان ئەرا نان دیمەشق راگەیانن، دویای ئەوە کە وەنواچگن گەورە و زیوەزوی لە وڵاتەگە وەدەس هاوردن.
یە یەکەم جارە کە باڵە چەکدارەیل بڕەسنە دیمەشق لە ساڵ ٢٠١٨ەو، هەناێ هیزەیل سوریا ناوچەیلیگ لە دەورگرد دیمەشق پایتەخت گلەو دان.
میدیایل راگەیانن ناوخوەیی خەوەردان کە فرۆکەخانەی دیمەشق چووڵ کریا، و گشت کاروانەیل ئاسمانی وسیان.
لەلای خوەییش، محمد جەلالی سەرۆک وەزیرەیل سوریا وت: ئومید خوازیمن سەردەم نوویگ وەجی باێد، و راگەیان کە شەوەکی چوودە ئەنجومەن وەزیرەیل، و ئامادەس ئەرا هەر ریکاریگ ئەرا دەسوەدەس کردن.
هەرلیوا، ئەنجومەن نیشتمانی حکومڕانی وەختانە لە سوریا لە بەیاننامەی شمارە یەک راگەیان، کە لەناوی پەیمان بیناکردن دەوڵەتیگ ئازاد و دادپەروەرانە و دیموکرات دا، کە گشت خەڵکەگە وەبی دووچەوەکی لەناوی یەکسان بوون.
ئەنجومەنەگە لە بەیاننامەیگ، ئمڕوو یەکشەممە، وت: ئمڕوو ئەرا گەل مەزن سوریا و گشت جیهان راگەینیمن، کە رژیم بەشار ئەسەد رمیا، و وەرەو دەیشت وڵات وایە، و میراتی ویرانکاری و زیان لە شوین خوەی هیشتە جیەو.
بەیاننامەگە وتیش: لەی رووژ میژوویە، هیزەیل شووڕش و ئۆپۆزسیۆن راگەینن کە کاروبار سوریا کەفتە دەسیان.
هەرلیوا، ئەنجومەنەگە لە بەیاننامەگەی پەیمان مقیەتیکردن یەکێتی و سەروەری زەویەیل سوریا دا، و مقیەتیکردن گشت هاوڵاتەیل وەگەرد داراییان، و کارکردن ئەرا دووارە بیناکردن دەوڵەت و دامودەزگایلی لە بنەمای ئازادی و دادپەروەرانە.
بەیاننامەگە دووپاتیش لەبان تەقەلادان ئەرا وەجیهاوردن ئاشتەوبوین بەرژەوەنی گشتگیر کرد، و گلەوداین پەنابەرەیل و کووچبەرەیل ئەرا میلکان خوەیان وە ئاسایش و سەربەزی، و دووپات لەبان سزادان هەرکەسیگ کرد کە تاوان وە گەل سوریا کردگە، وەگورەی یاسا و دادپەروەری.
لە بەیاننامەگە داوا لە گشت خەڵک گەل سوریا کرد ئەرا یەکێتی و پشتیەکگردن لەی قۆناغ میژوویە، و دووپات کرد سوریای نوو نیەکەفێدە دەس تەنیا کەسیگ، وەلێ نیشتمان گشتیە.