شەفەق نیوز/ ریخریاگ تەندروسی جەهانی، ئاشکرای دەرکەفتن بیماری نادیاریگ لە باکوور خوەرئاوای کۆنگۆ کرد، تا ئیسە بویەسە هوکار مردن زیاتر لە 50 کەس.

سێرگی نجاليباتو، وەرپرس پزشکی لە خەسەخانەی بيكورو، ئەرا ئاژانس"ئەسوشيتد پرێس" وت: ماوەی ناوەین ئاگا لە لویتکەی نشانەیل بیماریەگە و ناوەین مردن  فرە جار 48 ساعەت بویە، کە یە نیگەرانییگ دروس کەێد.

نووترین بڵاوبوین بیماری لە کۆمار کۆنگۆی دیموکرات لە 21 دویەم گوزەشت بوی، کە 419 تویشهاتن توومار کریا و 53 مردن لەناویان بوی.

وەگورەی نویسنگەی ریخریاگ تەندروسی جەهانی لە ئەفریقا، یەکەمین بڵاوبوین بیماریەگە لە ناوچەی بولوكو دویای خواردن شەمشەمەکوورەیگ وەلایەن سێ زاڕوو دەسوەپی کرد، کە هەرسێگیان وەماوەی 48 ساعەت دویای تویشاهاتن  وە تەو خوینوەربوین گیانیان لەدەسدان.

ریخریایەگە وتیش: دویای دویەم بڵاوبوین ئی بیماری نادیارە لە ناوچەی بوماتي لە نۆی فبراير، نموونە لە 13 بیمار ئەرا پەیمانگەی نیشتمانی تەندروسی لە كينشاسای پایتەخت کلکریا ئەرا تاقیکردن.

گشت ئەو نموونەیلە نەویین ڤایرۆس ئیبۆلا یا بیماریەیل تەو خوینوەربوین لەناویان چەسپیا،وەبێ لە بەشیگ لە نموونەیل مەلاریا بوی.

دەسەڵاتەیل تەندروسی لە کۆمار کۆنگۆی دیموکرات، خەوەردان لە دەرکەفتن بیمارییگ کە سەرچەوەگەی نادیارە لە ناوچەی باسانكوسو خوەرئاوای وڵاتەگە، و دیاری کردن کە زیاتر لە 943 تویشهاتن توومار کریاس، وەگەرد 52 مردن.