شەفەق نیوز- نیکۆسیا

6 کەس، رووژ یەکشەممە، گیان لەدەس دان، وەمدوو نوقمبۊن بەلەمیگ لە وەرانوەر کەنارەیل باکوور قوبرس، کە 267 کەس لەبانی بۊ، لەناویانیش 259 سەرنشین و 8 لە ئەندامەیل تیمەگە.

 کەناڵ "سی ئێن ئێن تورک"، لە زوان سەرۆک وەزیرەیل قوبرسییە تورکەیل ئۆناڵ ئۆستەل وت کە کەفتن قوربانییەیل دووپات کردگە، لە وەختیگ وەزیر کارەیل گشتی و گواستنەوە ئەرهان ئەریکلی ئەرا ئاژانس ئەنادۆڵ وت کە بەلەمەگە ئەو شمارە باسکریاگ لە سەرنشینەیل و ئەندامەیل تیمەگە لەبانی بۊە.

 ئاژانس فەرمی تورکی خەوەردا کە بەلەمەگە کە هن کەرت تایبەتە، سەعات 12:30 نیمەڕو وە وەخت ناوخوەیی، (12:30 وە وەخت بەغداد) لە بەندەر گیرنە لە باکوور قوبرس دەرچگ، و دەسوەجێ وە مدوویگ نادیار ئاو دەس کردە نزەکردن ئەرا ناوی، لە وەختیگ کە وەرەو بەندەر تاشوجو لە هەرێم مێرسین لە خوەرەڵات دەریای ناوەڕاس چیاد.

 سەرۆک شارەوانی گیرنە موراد شەنکۆل ئەرا کەناڵ "سی ئێن ئێن تورک" وت کە رەسیەنەسە لای 159 سەرنشین کە لەبان عەبارەگە بۊنە.

 دیمەنەیل وینەگیریاگ کەسەیلیگ نیشان دان کە پڕتاڵ قورتارکردن سۊر لەوەریانە، و لەبان بەلەمەگە دۊای پلیانی نیشتنە یا وسانە، لە وەختیگ دەسەڵاتەیل پاسەوانەیل کەنار و بەلەمەیل تایبەت کل کردن ئەرا دەسمیەتی لە هەڵگردنیان وەرەو کەنارەگە.

 رزگاربۊەیل ئەرا بەندەر گیرنە هاوریانە، و لەوەرەو ئەرا خەسەخانەیل، لە وەختیگ رووژنامەی "کیبریس" خەوەردا کە بەلەمەگە لە دویری نزیکەی 4 میل لە کەنارەگەو دەس وە پڕبۊن لە ئاو کردگە.