شەفەق نیوز- وەدۊاچگن

رێکخریاگ دەریایی ناودەوڵەتی، ئمڕوو سێشەممە، خەوەردا لە توومارکردن 68 رۊداو لە کەنداو و ئاوەیل نزیک لە تەنگەی هورمز ماوەی شەش مانگ لە جەنگەگە ناوەین ئیران و ویلایەتە یەکگرتگەیل و ئیسرائیل، کە بۊە مدوو کوشیان 20 دەریاوان و کارکەر لە بەندەرەیل و زەخمداربۊن 35 کەس ترەک، بیجگە لە گومابۊن یەک کەس.

ریخریایەگە کە سەروە نەتەوە یەکگرتگەیلە، وت کە رۊداوەیل وە تێکڕای یەک رۊداو ئەرا هەر 2.6 رووژ رۊ دانە، لە وەختیگ نزیکەی نیمەیان پەیوەندیدار بۊە وە نەفتکیشەیل، و نزیکەی 20% وە کەشتییەیل بارهەڵگر (کۆنتێنەرەیل) و 15% وە بارهەڵگرەیل کاڵا، وەپای ئاژانس "فرانس پرێس".

 ئاژانس ئۆپراسیۆنەیل بازرگانی دەریایی بەریتانی، دیاری کرد کە 47 رۊداو لە بڕ 68 رۊداو چۊ پەلامار توومار کریانە، لە وەختیگ ئەو کەشتییەیلە کە پەرچەم لیبیریا بەرزەو کەن زیاترین تویشهاتن وە رۊداوەیل داشتنە وە 13 رۊداو، و دۊای ئەوەیش کەشتییەیل پەرچەم پەنەما و دوورگەیل مارشاڵ وە 10 رۊداو ئەرا هەر یەکیگیان تیەن.

 ریخریایەگە باس  زەرەدمەنبۊن ئەو کەشتییەیلە کرد کە پەرچەم ئیرانی بەرزەو کەن لە چوار رۊداو، و دیاری کرد کە ئاست رۊداوەیل جیاوازی داشت ناوەین بەرزەوبۊن و نزمەوبۊن ماوەی قۆناغە جیاوازەیل لە جەنگەگە.

 تەنگەی هورمز، ماوەی مانگەیل گوزەشتە، چۊ یەکیگ لە تەوەرە سەرەکییەیل ئەرا ئەو ئاڵووزییەیلە دەرکەفت کە پەیوەندیدارن وە جەنگەگە، وە مدوو گرنگیی لە جۊلەی هامشوو نەفت و گاز و بازرگانی دەریایی جەهانی.