شەفەق نیوز- وەدۊاکەفتن
ناوەند ئاسایش دەریایی لە سوڵتانیش عومان، ئمڕوو سێشەممە، خەوەر دا لە کیشانن نەفتهەڵگر "ئێل جایا" کە ئاڵای پەنەما بەرزەو کەێد ئەرا یەکیگ لە بەندەرەیل عومانی، دۊای هەڵسیاه ئاگریگ لەناو ژوور بزوێنەرەیلی وە مدوو رۊوەڕۊبۊنی ئەرا پەلاماریگ لەوەرانوەر کەناراوەیل پارێزگای موسەندەم.
ناوەندەگە وت کە نەفتهەڵگرەگە لە دۊری نزیکەی 103 میل دەریایی لە باکوور خوەرهەڵات پارێزگای موسەندەم بۊە وەخت رۊوەڕۊبۊنی ئەرا پەلامارەگە، لە وەختیگ کەشتییگ سەروە هیز دەریایی عومانی 23 کەس لە ستافەگەی قورتار کردنە.
هەمیش وت کە دوو کەس لە ستاف نەفتهەڵگرەگە هیمان لە ریژەی گومبۊیەیلن.
دەسەی ئۆپەراسیۆنەیل بازرگانی دەریایی بەریتانی، ئمڕوو سێشەممە، لە سەرچەوەیگ کە وە پشتبەسیاگ وەسفی کرد بردگە کە کەشتییگ رۊوەڕۊ تویشهاتن وە تەقەمەنییگ بۊە کە چۊنیەتییەی دیاری نەکریایە لە گەروو هورمز.