شەفەق نیوز/ سریلانکا بڕیارە مانگ ئایندە دەس وە ئاڵشتکاری چای وەگەرد ئیران بکەێد لەبر ئەو ٢٥٠ ملیۆن دۆلارە ک قەرزار نەفتە، وەرپرسیگ سریلانکا راگەیان، لەوەختیگ ئەو وڵاتە قەیراناویە تەقەلا دەێد فرووشی ئەرا بازاریگ سەرەکی بەرزەو بکەێد و مقیەتیی بکەێد.
رامیش پاتیرانا، وەرپرس حکومەت سریلانکا راگەیان، رێککەفتن ئاڵشتکاری نەفت وە چای، ئەو سزایەیلە دەورە دەێد ک وەلایەن ئەمریکا خریاسە بان ئیران، چوینکە چای وە خوەراک دانریەد، هەمیش دیاریکرد، رێککەفنەگە بویە ک مانگانە وە بڕ ٥ ملیۆن دۆلار چای کلبکریەێد ئەرا ماوەی ٤٨ مانگ، باوجی پلان دیریمن مانگانە وە نزیکەی ۲ ملیۆن دۆلار دەسوەپی بکەێن".