شەفەق نیوز - واشنتۆن
جی دی ڤانس جیگر سەرۆک ئەمریکی، رووژ یەکشەممە، دووپات کرد کە واشنتۆن تەقەلا دەێد ئەرا وەدەسهاوردن پابەندبۊنیگ کۆتایی و یەکلاییکەر لە تەهران وە دووارە دروسنەکردن بەرنامە ئەتۆمییەگەی، لە وەختیگ تەقەلاگان ئەرا کۆتاییهاوردن ململانێ لە ناوەین هەردوگ وڵاتەگە هێمان رویوەڕوی سەختییەیل بوودەو، وەگەرد چگنی ئەرا ناو مانگ هەشتەمی.
ڤانس لە دیمانەیگ وەرد توڕ "سی بی ئێس نیوز" وت، کە ویلایەتە یەکگرتگەیل مسۆگەرییەیل کۆتایی لە ئیران تواێد لەباوەت بەرنامە ئەتۆمییەگەی، وە ئەوەگ دانا کە جەهان و ویلایەتە یەکگرتگەیل داوەزینیگ لە نرخەیل سزەمەنی وەخوەیانەو دوینن لە وەخت کۆتاییهاتن ململانێەگە.
ڤانس وتیش کە ویلایەتە یەکگرتگەیل "سەرکەفتنیگ یەکلاییکەر وەدەس هاوردگە" لە ئیران لەڕی ویرانکردن بەرنامە ئەتۆمییەگەی، وەلی دووپاتیش کردە بان گرنگی وەردەوامبۊن جەنگەگە ئەرا مسۆگەرکردن ئەوەگ تەهران دووارە توانایەیل ئەتۆمی خوەی دروس نەکەێدەو، و ریگری لە کەفتن قەیرانیگ جەهانی لە دابینکردن وزە.
وتیش: "من یەکەم کەس بویم کە خەوەر دامە پیتان کە نرخەیل سزەمەنی فرە بەرزن، وەلی سێ جار بەرزترەو بوون ئەگەر هیز دەریایی ئەمریکی نەهیشتیا نەفت و غاز وەردەوام بڕشن لەڕی تەنگەی هورمزەو".
دۆناڵد ترەمپ سەرۆک ئەمریکی چەن جاریگ دووپات کردۊد کە ویلایەتە یەکگرتگەیل توانایەیل ئەتۆمی ئیرانی ویران کردگە، بیجگە لە کەشتیگەل دەریایی و توانایەیل سەربازیی.
لە وەرانوەر یەیش، ترەمپ وەرجە چەن رووژیگ دەسنشان ئەوە کرد ئەرا دویرخستن ئەنجامداین پەلامارەیل لەبان ئیران لە وەخت ئیسە، وە دەسنشانکردن ئەرا ئەوەگ کە دانوسەنینەیل وەرد تەهران هێمان وەردەوامن.