شەفەق نیوز/ ریبال ئەسەد ئاموزای بەشار ئەسەد سەرۆک وەرین سوریا، وت: ئی سەرکردەیل نووە دڵنیایی لەلییان نییە، کە دویر لە گوزەشتەی تونەڕەوی خوەیان بکەفن یا بتوانن وڵاتەگە بکەنە یەکدەس.
ریبال لە دیداریگ وەگەرد تووڕ "سكای نيوز" بەریتانی رەخنە لە دەسەی ئازادکردنی شام گرد، و وت: کوشتن تووڵەسەنین جیوەجی کەن.
لە دەسنیشانکردن ئەرا ئەبو محمد جۆلانی ریبەر دەسەی ئازادکردن شام، ریبال وت: ١٠ ملیۆن دۆلار خەڵات هەس ئەرا هەرکەسیگ زانیاری ئەرا دەسگیرکردنی هەس، ئەو ئەندام بوی لە داعش ئیجا بویە سەرکردەی قاعیدە لە سوریا، چەنە رژیم وەرین لەی وڵاتە تاوان دیرن.
وتیش: ئایا باوەڕ کریەێد ئەو کەسەیلە کە سەدان هەزار تاوان دیرن، ئیرنگە بویشن هاتیمنەسە دەسەڵات و ئاڵشتکاری کەیمن؟.
ریبال باس ئەو باڵەیل چەکدارە کرد کە توەنستن رژیم بەشار ئەسەد بڕمنن، و توومەتباریان وە کوشتن کرد، و وت؛ نیەخوازیمن سوریا هەکاتی ئیران وەرجە ٤٥ ساڵ وەپی باێد، کە رژیم دیکتاتۆر شاه وە شێخ و مەڵا ئاڵشتکردن، و ئیرنگە گشتی کەفتیەسە زیان، نەک تەنیا لە ئیران، وەلێ لە ئاست جەهان.
ئاموزای بەشار ئەسەد وتیش: هەناێ تەمەنی نۆ ساڵان بویە لە سوریا دەرچگە، و باوگی دەسی لەناو کوشتارەیل نەویە، و وتیش: تەنیا یەی گلە چەوی کەفتیەسە بەشار ئاموزای، ئەوەیش لە ساڵەیل نەوەت بویە هەناێ هاتیەسە سوریا.
وتیش: ئەو تەنیا جارە بەشار دیمە بویەسە دەمەقاڵمان و لەڕویی وسیامە، و دویای چەن مانگیگ کەسەیلیگ لەناو فرۆکەخانەی ناودەوڵەتی دیمەشق تەقەلای کوشتنم دان.
ریبال وتیش: بەشار تینگ دەسەڵاتدارییە و لە پرسەی براگەی کە وە رویداویگ هاتوچو مرد رویی خوەش بوی، چوینکە تەگبیر بوی ئەو بوودە سەرۆک، کە هەر ئیرنگە براگەی مردگە و مەردم تەرم براگەی هەڵگردنە، و یەیش دەس بەرزا کەێد کە خوازێد بویشێد دی خوەم بوومە سەرۆک، ئی کابرا حولحولیە و هویچ دڵسووزی و بەرزییگ لەناو دڵی نییە.