شەفەق نیوز/ شیوەی ڤایڕۆسە نووەوبیوگە ک ئەرا چەن مانگیگ پەک جهان خست هالە پەلەکردن، وکەرتەیل گرنگیگ بەسا، وە شەوو رووژیگ تووشهاتنەگان وەهەزاران بەرزەوبوی.

بڕ ژمارەی تووشهاتنەگان وە ڤایڕۆس کۆڕۆنا ک لە جهان تۆمار کریا لە ١٨ ملیۆن رەدکرد، وەگورەی ئامار فڕانس پڕیس، ک ئمڕوو دووشەممە بڵاوی کرد، لەبنەمای سەرچەوەیلیگ فەرمی تا ساعەت ٢٢:٤٠ دویەکە.

لەلای کەمەو دەور ١٨،٠١١،٧٦٣ تووشهاتن ئامار کریا، وەگەرد پەلەکردن بڵاوبوین پەتاگە. و نیم تووشهاتنەگان لە جهان هالە ئەمریکا و ئەمریکای لاتینی و ناوچەی کاریبی.

ئەمریکا زەرەدمەنترین دەوڵەتە لە جهان وە ٤،٦٥٧،٦٩٣ تووشهاتن، لەلیان ١٥٤،٧٩٣ مردنە، ئیجا بەڕازیل وە ٢،٧٣٣،٦٧٧ تووشهاتن و ٩٤،١٠٤ مردن، وسێەم دەوڵەت خوەی وڵات هیندە وە ١،٧٥٠،٧٢٣ تووشهاتن و ٣٧،٣٦٤ مردن. وەگەرد ئەوە، بڕ مردنەگان لە جهان رەسیە ٦٨٧،٩٤١.