شەفەق نيوز/ کۆمپانیای بەشەوکردن کارەبا لە پارێزگای برز ئیران، ئمڕوو دووشەممە، بڕیان کارەبا لە بەشەیلیگ لە شار کەرەج لەوەر گورزەیل ئیسرائیل وەبان بەشیگ لە ناوچەیل شارەگە راگەیان.
وەڕیەوبەر کۆمپانیاگە ئەرا ئاژانس تەسنيم ئیرانی وت: بڕیار کارەبا تەنیا ئەو ناوچەیلە گردەو کە لە پەلامارەگە زەرەد وەپییان رەسیە، لە وەختیگ کارەبا و شیوەیگ سروشتی لەو شوینەیل کارەم و جویراجویر پارێزگایەیل وەردەوامە.
وتیش؛ تیمەیل فریاکەفتن و وەکارخستن لە کۆمپانیای کارەبا لە برز هانە ئامادەباشی تەواویگ و ئیرنگە پەسا کار لە خاسەوکردن و گلەوداین کارەبا ئەرا ئەو ناوچەیلە کەن کە زەرەد وەپییان رەسیە وەزویترین وەخت.
هەرلیوا، بڕیان وەختانە لە تەهران پایتەختیش خاسەو کریا، کە لە ئەنجام ئەو تەقینەوە بڕیا کە نیمەڕو ئمڕوو لە ناوچەی ئیڤین بویە مدوو پەککەفتن کڕەیل کلکردن کارەبا و وسیانیگ وەختانە لە چەن شوینیگ لە باکوور شارەگە.
پەیوەندییەیل گشتی کۆمپانیای کارەبای هەرێمی لە تەهران لە بەیاننامەیگ دووپات کرد کە کارەبا لە ماوەی کەمتر لە یەک ساعەت دویای رویداوەگە گلەو دریا.
وتیش: گشت بەشدارەیل لە شار تەهران خزمەت کارەبای ئارامیگ دیرن.
وەرجەیە، ئاژانس رۆیتەرز خەوەردا کە شەپوولیگ لە گورزەیل ئیسرائیل تەهران پایتەخت کردە ئامانج، و بویە هوکار بڕیان کارەبا لە ناوچەیل باکووری.
ئاژانس میهر خەوەر ئیرانی دووپات کرد کە یەکیگ لە کڕەیل کلکردن کارەبا لە ئیڤین باکوور تەهران زەرەد وەپی رەسیە لە ئەنجام پەلامارەیل قەوارەی سەهیۆنی، وتیش: بڕیان فراوانیگ لە کارەبا نییە.