لە شمارەیل فەرمی ناوەندەیل کەشناسی ئەوروپا دەرکەفت کە مانگ حوزەیران گوزەشتە گەرمترین مانگ بوی لە میژوو جەهان.

رووژنامەی دەیلی مەیل بەریتانی لە راپۆرتیگ باس لە دووپاتکردن ناوەندەیل کەشناسی ئەوروپا کرد کە پلەی گەرمی لە مانگ گوزەشتە رەسیە شمارەیل پەیمانەیی، کە بویە (سویەرترین حوزەیران) وەلێ وەشیوەی گشتی کەفێدە پلەی سیانزە لە توومارکردن شمارەیل پەیمانەیی.

وەگورەی زانایەیل بەرنامەی ئاڵشتبوین  کەشوهەوا سەروە یەکێتی ئەوروپا، لە ئاست جەهان، زەوی لە مانگ حوزەیران سویەرترین بویە.

مانگ گوزەشتە نەک تەنیا سویەرترین لە ساڵ 2024 بویە، بەڵکم سیانزەهەمین مانگ بوی لە پشتیەک کە شمارەی پەیمانەیی لە پلەی گەرمی بەرز وەشیوەی گشتی شکان.

پسپۆڕەیل ئویشن؛ تەکان گاز گەرم مدوو گەرمیە، و هوشداری لە کارەسات کەشوهەوای وەردەوام دەن.

وەگورەی خزمەتگوزاری کۆبرنیکۆس ئەرا ئاڵشتبوین کەشوهەوا (C3S) لە یەکێتی ئەوروپا، ناوڕاس پلەی گەرمی جیهانی لە مانگ حوزەیران رەسیە 61.98 پلەی فهرنهايت (16.66 پلەی سەدی)، و یەیش وەگورەی 0.25 پلەی فهرنهايت (0.14 پلەی سەدی) لە پلەی گەرمی ناوەین گوزەشتە لە مانگ حوزەیران 2023 گەرمترە.

ئەوەگ جی نیگەرانیە، ئی شمارە وەگورەی 1.2 پلەی فهرنهايت (0.67 پلەی سەدی) لە ناوڕاس جەهانی لە ماوەی 1991-2020 لە مانگ حوزەیران گەرمترە.