شەفەق نیوز - ئیسلام ئاباد

حکومەت پاکستان، ئمڕوو پەنجشەممە، کوشیاین 22 ترۆریست و لەناوبردن بڕیگ فرە لە چەک و تەقەمەنی لە پەلامارەیل ئاسمانی لەبان شوینەیلیان لە ئەفغانستان راگەیان.

لە لای ترەو، وەرپرسیگ ئەفغانی وت: پەلامارەیل ئاسمانی پاکستان لەبان وڵاتەگەی چوار کەس کوشتیە و شەش کەس ترەک زەخمدار کردیە.

سەرۆک بەش راگەیانن و فەرهەنگ لە هەرێم هلمەند "مەولەوی شیر محمد وحدت" وت: رژێم سەربازی پاکستان پەلامارەیل ئاسمانی لەبان دو مال لە ناوچەی جرمسیر لە هەرێم هلمەند ئەنجام دایە.

لە لێدوانیگ ئەرا ئاژانس خەوەر "رۆیتەرز" وت: "وەپای ئامارەیل سەرەتایی، تا ئیسە چوار کەس کوشیانە و شەش کەس ترەک زەخمدار بوینە، و فرەیگ کوشیاگ و زەخمدارەیل لە ژنەیل و مناڵەیلن".

ئەیە هاووختە وەگەرد ئەوەگ وەزارەت وەرگری ئەفغانستان یەکشەممەی گوزەشتە راگەیان،  هێزەیل 28 چەکدار کوشتنە و 32 کەس ترەک زەخمدار کردن لە هەرێم نورستان لە خوەرهەڵات وڵاتەگە، دویای رەدکردن سنوور وەدەس دەسەیگ لە پاکستان کە وەزارەتەگە وت کەسەیلیگ لە رێکخریاگ داعش لەناویان بویە.