شەفەق نيوز/ حەنیف عەباسی وەزیر کڕ ئاسنین پاکستان، هەڕەشەی هندستان دا وە گورزیگ ئەتۆمی ئەگەر وەردەوام بوود لە هەڕەشەی ئاو پاکستان.

عەباسی لە کۆنگرەیگ رووژنامەوانی، ئمڕوو دووشەممە، هوشداری دا کە مووشەکەیل ئەتۆمی پاکستان، جویر "غوري" و"شاهين" و"غەزنەوی"، روی وەرەو هندستان کردنە و هەر ئەرا جوانی نەخریانەسە ناو جادەیل.

عەباسی وتیش: ئەگەر ئاومان بووڕین هەناسدان بڕیمن، دووپاتیش کرد بە پاکستان ئامادەس ئەرا جەنگکردن وەرد هندستان، وتیش؛ هویرەو بکەن ئەگەر ئیوە یەی مووشەک وەشانین ئیمە 200 مووشەک وەبان ئیوە وەشنیمن، چە وەسەردان تیەێد؟ وەرەو کوو واین؟ ئیمە ئامادەیمن ئەرا جەنگ وەرد ئیوە، و رخن نییمن.

وتیش؛ هندستان نیەزانێد مووشەکەیل پاکستان لەکوو نریانە.

ژاوەژاویگ کەفتە ناوەین ئەو دوو وڵاتە، دویای ئەوە کە هندستان واز لە بەشداریکردن لە پەیماننامەی چەم سند هاورد، ئەوەیش لە شوین ئەو پەلامار تیرۆریە لە باهالگام، کە بویە هوکار کوشیان 26 گەشتیار، و ویرانکاری تەقینەوەی شەو جمعە ئەرا دوو ماڵ هن چەکدارەیل گروەپ "لەشگر تيبە" کە دەسیان لەناو پەلامارەگە بویە.

ئەو پەلامارە لە نيسان، یەکێک بوی لە خویناویترین پەلامارەیل لەی ساڵەیل دویاییە.

وسانن پەیماننامەگە لەلایەن هندستان سای خستە بان تەکانەیل ئاو وەرەو پاکستان، وەتایبەتی لە کشتوکاڵی و وزە.

 ئیسلام ئاباد ئەو بڕیار هندستانە وە راگەیانن جەنگ باس کرد، و دووپات کرد کە کاریگ یەکلاییکەر جیوەجی کەێد ئەگەر ئی هەڕەشەیلە وەردەوام بوین.

هەرلیوا، پاکستانیش ئی گامە لەلایەن هندستان وە بیوینە باس کرد، کە لەوەختیگەو لە ساڵ 1960 لەبان پەیماننامەی چەم سند واژوو کریاس، کە یەکەمین جارە ئیجویر کاریگ بوود.

وەرانوەر ئەوە، هندستان فەرمان وە گشت هاوڵاتیەیل پاکستان دا وەماوەی 48 ساعەت وڵاتەگە وەجی بیلن و سنوورەگە بەساد، ئەوەیش لە وەڵامدانیگ وەردەوام لەبان ئەو پەلامارە.

 ناريندرا مودی، سەرۆک وەزیرەیل هندستان، سەردانی ئەرا سعودیە کوڵبڕەو کرد، و وەزوی ئەرا دیلهی گلەو خوارد، و فیکرام میری وەزیر دەیشت هندستان راگەیان کە سڵاکارەیل سەربازی لە باڵیۆزخانەی پاکستان وە کەسەیلیگ نەخوازیاگ دریەنە قەڵەم، و شاندەیل دیبلۆماسی هەردوگ وڵات ئەرا نزیکەی نیمە داوەزانن.