شەفەق نیوز- لەندەن

شەپوول گەرما لە بەریتانیا بۊە دیمەنیگ کارەساتبار، دۊای ئەوەگ ئاگرەیل دارستانەیل دریژەو بۊن ئەرا ناوچەیل نیشتەجیبۊن و دەیان لە دانیشتگەیل ناچار کردن ماڵەیلیان چووڵ بکەن، هاوەخت وەگەرد توومارکردن پلەیل گەرمی کە رەسیە 38.1 پلەی سەدی.

 وەپای میدیایەیل راگەیانن، دانیشتگەیل ناچار بۊن ئەرا واین لە ماڵەیلیان، هەگ داوا لە بڕیگیان کریا دیوارەیل دەیشت ماڵەیلیان تەڕ بکەن وەرجە وەجیهیشتنی، وەگەرد دریژەوبۊن بڵویزەیل ئاگر کە رووبەرەیل فراوانیگ لە زەۊیە گیایەیل سزان و رەسیە ناوچەیل نیشتەجیبۊن.

وتیش کە ئاگر دارستانەیل 6 ماڵ لە شار ستۆربریدگ خاپوور کرد، کە یەکیگە لە چەن ئاگریگ کە خزمەتگوزاری ئاگرکەوپکردن لە خوەراوای میدلاندز خستە ئامادەباشی.

کەسەیلیگ باس ئەوە کردن چۊن بڵویزەیل ئاگر "لە ماڵیگەو ئەرا ماڵیگ ترەک چن"، کە دانیشتگەیل واین و ئەوەگ وەپییان کریا هەڵگردن، و مناڵیگ و 3 لە پیاوەیل ئاگرکپەوکەر بریان ئەرا خەسەخانە ئەرا وەرگردن چارەسەر.

لە لای خوەییشەو، سیمۆن تۆهیل، فەرماندەی خزمەتگوزاری ئاگرکپەوکردن لە خوەراوای میدلاندز، وت کە تیمەیل  وەرد هەزاران پەیوەندی فریاکەفتن رەفتار کردنە.

لەلای خوەییشەو، راوێژکار ناوخۆیی ئەندرۆ ترومانز، وت کە "دیمەنە رخدارەیل لە نۆرتۆن و گشت ستۆربریدگ، تەنیا نیشانەیگە لەوەگ کە تیەێد ئەگەر نەکەفیمنە جۊلە".

و سەرۆک وەزیرەیل ئاندی بێرنهام، شوینەوارەیل ئاگرەگە وە "رخدار" باس کرد، و هاوسووزیی خوەی وەگەرد "گشت زەرەدمەنەیل نشان دا، وە تایبەت زەخمدارەیل و ئەوانەگ ناچار بۊن ماڵەیلیان چووڵ بکەن، و وەگەرد ئەو پیاوەیل ئاگرکپەوکەرە کە بریان ئەرا خەسەخانە".

وتیش کە لە پەیوەندییە وەگەرد سەرکردە ناوخۆییەیل، لەناویان پارێزگار خوەراوای میدلاندز ریچارد پارکەر، و دووپات کرد کە "قسە وەرد تیمەیل فریاکەفتن مەیدانی کەێد لەوەخت وەردەوامبۊن تەقەلایەیل وەڵامداین".

 نزیکەی 100 پیاو ئاگرکپەوکەر بەشداری کردن لە کپەوکردن ئاگرە گەورەگە کە لە نزیک یاریگەی گۆڵف ستۆربریدگ لە نیمەڕو هیز کرد، و نزیکەی 40 فەدان لە زەۊەیل سزان، مە یاریزانەیل گۆڵف لەبان عەرەوانە بۊچگەگەیل خوەیان واین ئەرا دۊرکەفتن لە بڵویزەی ئاگر.

و لە خود وەخت، و دویری کەمتر لە 30 میل، خەوەردا لە "رۊداویگ گەورە"ی ترەک وە مدوو ئاگریگ گەپ کە ناوچەی سالفۆرد برایۆرز لە ستراتفۆرد ئەپۆن ئاڤۆن داگرد.