شه‌فه‌ق نيوز/ وڵاته‌يل يه‌كگرتگ ئه‌مريكى داوا له ده‌وڵه‌ته‌يل كه‌نداو كرد مقه‌يه‌تى له يه‌كگرتگى خوه‌يان بكه‌ن و كار له‌بان لاوردن ناكووكى ناونيان بكه‌ن، ئه‌ويش دوياى چه‌ن سه‌عاتيگ له بڕين په‌يوه‌ندێ دبلۆماسى سێ ده‌وڵه‌ت له‌ليان وه‌ل قه‌ته‌ر.
له‌ى باوه‌ته‌و، ريكس تيلرسون وه‌زير خارجيه له كۆنگره‌يگ رووژنامه‌گه‌رى له سيدنى پايته‌خت ئوسترالى قسه‌ێگ له‌بان بڕين ئه‌و په‌يوه‌نديه‌يله وه‌ل دۆحه كرد و وت: بيگومان هان لايه‌نه‌يل تر ئه‌يه‌يم ئه‌را دانيشتن وه‌لياو ئه‌را چاره‌سه‌ر ئى ناكووكيه‌يله.
تيلرسون وت: وڵاته‌يل يه‌كگرتگ ئاماده‌س ئه‌را ده‌سميه‌ت و هاكاريكردن لايه‌نه‌يل ئى قه‌يران دبلۆماسيه له‌بان وازكردن لاپه‌ڕه‌ێ تازه‌يگ و به‌سانن ئى لاپه‌ڕه‌ێ ئى ناكووكيه‌يله.
جى باسه، ده‌مه‌و شه‌وه‌كى دوشه‌ممه به‌حره‌ين و سعوديه‌و ئيمارات و مسر ئاشكراى بڕين په‌يوه‌نديه‌يل دبلۆماسى كردن وه‌ل قه‌ته‌ر و ماوه‌ى 14رووژ دان ئه‌را ده‌رچگن قه‌ته‌ريه‌يل له‌ناو خاكه‌يليان، ئه‌ويش له‌وه‌ر ئه‌وه‌گ قه‌ته‌ر ده‌خاڵه‌تكردن قه‌ته‌ر له هه‌وڵه‌يليان و شيوانن سه‌قامگيرى له ناوچه‌گه.