شه‌فه‌ق نيوز/ به‌شار ئه‌سه‌د سه‌رۆك سوورى له ديمانه‌يگ وه‌ل هووكاره‌يل ره‌سانن، جه‌خت له‌بان ئه‌وله‌ويه‌ت ئيسه‌ى رژێم كرد ك ئه‌ويش هاوردنه‌وه‌ى ده‌سڵاته له پاريزگاى ئيدلب له باكوور خوه‌رئاواى وڵاته‌گه‌و له‌هه‌مان وه‌خت هه‌ڕه‌شه‌ێ له‌ناوبردنيش له چه‌كداره‌يل "كڵاو چه‌رمگه‌يل" كرد.
ئه‌سه‌د له‌لايه‌يگ تريشه‌و داوايش له مليۆنه‌ها سوورى كرد ك وڵاته‌گه‌يان وه‌جى هيشتنه له سه‌ره‌تاى كيشمه‌كيشه‌يل له ساڵ 2011ه‌و تائيسه بانه‌و ئه‌را سووريا ك هه‌رچه‌نى جه‌نگيش له‌تى كوتايى وه‌پى ناتگه.
ئه‌سه‌د وت: ئيسه ئامانجكان ئه‌وه‌سه ئيدلب وه ته‌مامى كۆنترۆڵ بكه‌يم ك هه‌رچه‌نى ته‌نيا ئامانجيگ نيه‌و باس له‌وه‌يش كرد ك خاكه‌يليگ هه‌ن له رۆهه‌ڵات سووريا كه‌فتنه‌سه ژير ده‌سڵات كۆمه‌ڵه چه‌كداره‌يل جياجيا و هه‌ر وه‌و خاتريشه پيشڕه‌وێ له گشت ناوچه‌يل ئه‌كه‌يم و ئيدلبيش يه‌كيگه له‌و ناوچه‌يله.