شەفەق نیوز - واشنتۆن
جۆن راتکلیف، وەڕێوەبەر دەزگای هەواڵگریی سی ئای ئەی، لە کۆنگرێس باسیگ لە پەلامارە سەربازییەیل ئی دواییە کرد کە بەرنامەی ئەتۆمی ئیران کردە ئامانج، و دووپات کرد کە زیان فراوانیگ وە دامەزراوە ئەتۆمییەیل ئیران رەسانیە.
وەگورەی راپۆرتە میدیاییەیل ئەمریکا، راتکلیف وە یاسادانەرەیل وت؛ پەلامارەیل تاکە دامەزراوەی ئاڵشتکردن کانزای ئیرانی لەناوبردگە کە پێکهاتەیگ سەرەکییە لە دروسکردن ناوەک چەک ئەتۆمی، و ئی زیانەیلە وە "دیرخستنیگ وەرچەو" باس کرد کە ئیران ساڵان فرەیگ خوازێد تا لەلی دەرچوود.
هەڵسەنگاندنەگەی سی ئای ئەی کە لە بنەمای هەواڵگریی و سەرچەوەیگ کە وە "راسی میژوویی" باسی کردگە، باس لەناوبردن چەن دامەزراوەیگ سەرەکی ئەتۆمی لەو وڵاتە کردگە، کە دووپات کەێد فرەی یۆرانیۆم پیتینریاگ ئیران لە دامەزراوە ویرانەیل ئیسفەهان و فۆردۆ خریانە ژیر خاک.
ئی کۆنگرە لە وەختیگ تیەێد کە مشتومڕیگ لەناو کۆنگرێس ئەمریکا لەبان کاریگەری گورزەیل دروس بویە، دویای ئەوە کە چەن هەڵسەنگاندیگ سەرەتایی باس بەوە کردنە کە هاتێ زیانەیل ئەوەنە قورس نەون کە ئیدارەی ترەمپ بانگەشە ئەرای کەێد.