شەفەق نیوز/ نەتەوە یەکگرتگەیل، ئمڕوو چوارشەممە، دراوردن 6 تەرم و بیسەروشوینی 40 کووچبەر و رزگارکردن دەی ترەک راگەیان، دویای نوقمبوین بەلەمیگ لاستیکی وە 56 کەسەو لە دەریای ناوڕاس نزیک دوورگەی لامبیدوسای ئیتاڵیا.

 وەگورەی نوینەر کۆمسیۆن نەتەوە یەکگرتگەیل ئەرا کاروبار پەنابەرەیل، کیارا کاردولیتی؛ پەس پیرەکە دووشەممە، ئەو بەلەمە لە کناراوەیل تونسەو کەفتە ری، و 56 کەس خەڵک ساحل عاج و مالی و غاملیا و کامیرۆن لەناوی بوین.

وتیش: دویای چەن ساعەتیگ وا لەناو بەلەمەگە نەمەن، و ئاو چگە ناوی، و 6 تەرم پەیا کریا، و 40 کەسیش بیسەروشوینن.

دەسەڵاتەیل ئیتاڵیا 10 کەس رزگار کردن، کە 6 پیاو و4 ژن بوبنە، وەکورەی میدیایل ئیتاڵیا.

ئەو کەسەیلە کە رزگار بوینە وتن کە دەریاگە بەرزەو بویە و بڕیگ کەس بیسەروشوین بوینە، و تەقەلای رزگارکردن ئەوەکانیش شکست هاورد. 

هەرلیوا، 40 کەس ترەک کە کووچبەر بوینە، وەناو بەلەمیگ کانزایی لە تونسەو رەسینە کناراوەیل لامبیدوسا.

 راپۆرتەیل باس رەسین 213 کووچبەر ترەک وە پەنج بڕەو ئەرا ئەو دوورگە کردن، کە شمارەی ئەو کەسەیلە کە رەسینە بنکەی پیشوازیکردن رەسیە 230 کەس.

 وەگورەی وەزارەت ناوخۆی ئیتاڵیا، نزیکەی 8743 کووچبەر لە سەرتای ساڵە تا ئیسە رەسینەسە وڵاتەگە، کە ئەو شمارە کەمیگ لە شمارەی خود ماوە لە ساڵ گوزەشتە بەرزترە.