شەفەق نیوز- تاران
ئاژانس خەوەری ئیرانی "ئیرنا"، ئمڕوو چوارشەممە، خەوەردا لە کوشیان 11 کەس و زەخمداربۊن 58 کەس تر وە مدوو گورزەیل ئەمریکا کە شوینەیلیگ لە پارێزگایەیل هورمزگان و خوزستان لە باشوور و باشوور خوەرئاوای ئیران کردە ئامانج.
جیگر پارێزگار هورمزگان ئەرا کاروبارەیل سیاسی و ئەمنی و کۆمەڵایەتی ئەحمەد نەفیسی، وت کە شمارەی کوشیاگەیل پەلامارە ئەمریکییەگە لەبان ئاهەنگ سۊریگ لە شار کوهستەک لە دورگەی سیریک ئەرا چوار کەس بەرزەو بۊ، کە مناڵیگ لەناویانە، لە وەختیگ 50 کەس تر زەخمدار بۊن.
لە خوزستان، جیگر پارێزگار ئەرا کاروبارەیل ئەمنی و پولیس وەلیولڵا حەیاتی، خەوەردا لە کوشیان هەفت کەس و زەخمداربۊن هەشت کەس تر وە مدوو پەلاماریگ موشەکی ئەمریکی کە سێ خاڵ لە پارێزگاگە کردە ئامانج، لە شەو سێشەممە.
"ئیرنا" خەوەردا کە گورزەیل خاڵەیلیگ لە دەورگرد هەردوگ شار ئەهواز و ئاغاجاری کردنەسە ئامانج.
فەرماندەیی ناوەندی ئەمریکی "سێنتکۆم"، شەوەکی زۊ چوارشەممە، خەوەردا لە تەواوبۊن شەپۆلیگ لە گورزەیل کە شوینەیل و توانا سەربازییەیل ئیرانی کردنەسە ئامانج.
فەرماندەییەگە، لە بەیاننامەیگ وت کە هیزەیلی شوینەیل سەروە سوپای پاسداران ئیرانی کردنەسە ئامانج، کە سیستمەیل وەرگری ئاسمانی و سیستمەیل رادار لەناویانە، بیجگە لە سامان و دامەزراوەیل دەریایی و توانایەیل گریەدار وە چنین مین و شوینەیل پەیوەندیکردن.