شەفەق نیوز/ لە ساڵ 1896 سوڵتان حەمید بن توانی، سوڵتان وڵات زینزیبار، کە لایەنگر بەریتانیا بوی، لەناکاو کووچ دویایی کەێد، گومان کرێد خالید بن بارغاشی برازای ژەهرخواردی کردبوی، خالید ئەو مەوقە 29 ساڵی بوی و بی ڕێکەفتن وەرد هویچ کەس و لایەنیگ چێد ئەرا کۆشک سوڵتان و خۆی جویر  سوڵاتان نوو ناسنێد و پەیماننامەی 1890ـی وەرد بریتانیا پێشێل کەێد.

لە 27 ئاب 1896، ساعەت 09:02 خولەک شەوەکی هێزە بەریتانییەگان بۆمب وەرەو کۆشک سوڵتان تەقنن و سەرجەم چەکەیل سوپای زینزیبار لەناودەن، لەهەمان وەخت کەشتییە جەنگییەگان بەریتانیا چەن کەشتییگ جەنگیی وڵات زینزیبار نوقم کەن، خالید بن بارغاشی دەسوەجی لە کۆشکەگە واد  و پەنا ئەرا کونسوڵ ئەڵمانیا بەێد و لە ساعەت 09:37  سوپاگەی ئاڵای چەرمگ هەڵ کەن و خوەن دەنە دەس، وەیەش جەنگ  بەریتا-زینزیبار بوودە کوڵترین جەنگ لە مێژوو.