شه‌فه‌ق نيوز/ بەشيگ گەورای زەردۆئی سەر وە تیرەی کەمانگەرن، ئى تیرە یەکيگه لە تیرەيل گه‌وراى جاف، رووڵه‌يل ئى تيره جاران له ناوچه‌يل ئافريان ژويه‌ر و خوارگ، ماويان، كورەدەرە، تفين، ساتياری، قەرەویس، کۆڵەسارە، ماسان، کەوانە، پاڵنگان، گرگان، عەنەب و دەرەشیش نيشتەجێ بوون، وه‌لێ شوون وماوى ئيسه‌يان ئه‌كه‌فێده سنوور هه‌ردوگ پاريزگاى كرماشان و سنه ناوچه‌ى بيلور.
مه‌رز باكووريان: كرمانشان و كامیاران، مه‌رز باشووريان ميان دەربەند كرماشانە، مه‌رز خوه‌رهەڵاتیان ناوچەی بيلورەو، له خوه‌رئاوايشەو كنار كويه‌ێ شاهۆ و روانسەرە.
بڕيگ له‌ليان له تاوسانه‌يل بار كرديان ئه‌را ناوچه‌يل: ماراب، گرکان، کنار ده‌رياچه‌ى قەرەسو و سەرچەم گڕکان، نەهار، كويه‌ى شاخ شكن، لە زمسانيش چيانە: زەهاو، نەسر ئاباد.
ناو کەمانگەر (کەوانگەر): یەکەم: لە (کەمان) کەوان دروستکردنەو هاتگە. ئه‌يانه لە دروستکردن کەوان (کەمان) ئوسا بووينەو شووره‌ت وه‌و پيشه‌وه ده‌ركردنه، دووەم: له جه‌نگ تیر و کەمان (کەوان) وه دقه‌ته‌و هاوردهنه‌سه كار و نيشانيان وه غه‌ڵه‌ته‌و نه‌چيه.
ئى تيرە تا سەردەم ئيمام قولی ميرزا عيمادولدەولە تيرەیگ ره‌وه‌نى بوين و جوور هەردوگ تيرەی شەرەفبەیانی و دوورويی، تيرەيگ تاك و خوه‌يان وه‌خوه‌يانن و هويچ لقيگ له‌ليان ناكه‌فێده‌و.
هه‌ناى ك قه‌واره‌ى يه‌كگرتگى ئێڵ جاف دامه‌زريا، كه‌مانگه‌ره‌يل په‌يوه‌ندى وه‌و يه‌كگرتگه‌و كردن و بوينه تيره‌يگ گه‌ورا له جاف جوانڕۆ. له‌سه‌رده‌م كويه‌نيش ئيبراهيم خان كه‌مانگه‌ر باپيره گه‌ورايان لە ناوچەی شارەزوور و هەڵەبجە وەتایبەت لە ئاوايى دەرەشيش و عەنەب, وەخوه‌ى و تيره‌گه‌يه‌و بار كردن و هاتنه شوونه‌يل ئيسه‌يان ك وه فه‌رمان ده‌سڵاتداره‌يل ميرنشينى ئه‌رده‌ڵانى داوا له‌ليان كريا شوون خوه‌يان جواز بكه‌ن ئه‌را ناونى كرماشان و سنه، چوينكه بۆشايى ئه‌منى له‌و ناوچه وجوود داشت و هه‌ر وه‌و خاتريشه داوا له ئيبراهيم خان كه‌مانگه‌ر كردن بچێده ئه‌و شوونه.
دوياخر ده‌سڵات ئى تيره كه‌فته ده‌س مه‌حمود به‌گ كه‌مانگه‌ر نيزامولمەليك (ئاغا محمود حاجى ئاغا) ك كەسيگ ئازاو خاوه‌ن شانيه‌ت بوێ و مقه‌يه‌تى له يەکپارچەیی و هێزی تيرەگەی بكا له‌وه‌ختيگ ك هووزه‌يل هاوساى وه بوونه‌ى بارودۆخ سياسی و ئابووری و كۆمەڵايەتیی ناهەموار ئەو سەردەمەو تويش لاوازی و سسی هاتوين.
مه‌حمود به‌گ (ماراب) كردە مەڵوەن خۆی و هووزه‌گه‌ێ و گەشە وه‌پى داو فريه‌يش پيشكه‌فتن داپى، وه‌لێ ده‌رئه‌نجام خوه‌ێ و دووان له كوڕه‌يلێ(ئه‌حمه‌د خان و محه‌مه‌د خان)له‌جه‌نگ ناونى تيره‌ى كه‌مانگه‌ر و ئێڵ سنجاوێ وه فه‌رمان عه‌لى ئه‌كبه‌رخان(سه‌ردار موقته‌در)كوشيان، له‌شوون ئه‌وه‌يش كوڕەزاگەی سلێمان خان كەمانگەر(سلێمان خان كوڕ عەلی خان شوجاعولمه‌ليك كوڕ ئاغا مه‌حمود حاجی ئاغا) ناوبانگ و دەسەڵات پەیا كرد. ك يه‌يش كه‌سيگ ئازاو به‌خشنده‌و زاناو رووشنهوير و له‌خودا ترس و دڵسووز بوێ ئه‌را ئه‌شره‌ت و قه‌ومه‌يلى.
جوتیار کەمانگەر