شه‌فه‌ق نيوز/ نازاره ميرزا، ئه‌و ئافره‌ته ك له كويچه‌ى قشڵ له به‌غدا ئه‌را ماوه‌ى ساڵه‌يل فريه‌يگ ژيا، ده‌سڕه‌نگين بوى له چنين قالى، تا ڕاده‌يگ ك يه‌كيگ له ده‌وڵه‌مه‌نه‌يل كورد فه‌يلى داوا له‌لى كرد قالييگ بچنێد و وێنه‌ى سه‌ركرده عه‌بدولكه‌ريم قاسم بخاده‌ى قه‌ى قاليه‌گه، ئه‌ويش چنييه‌ى وه جوانترين نه‌خشه‌يليگ.
نازاره قالی له‌ماڵ خوه‌ی چنياد تا رووژيگ ك رژيم سه‌دام كووچ وه‌پيان كرد ئه‌را ئيران، ك تائيسه‌يش زينگه‌و له شار ئيلام ژيه‌يد.
قالیچنين له كويه‌نترين پيشه‌يليگه ك ژنه‌يل كورد له‌لی كاركردنه، وه‌ل ئه‌وه‌يشا ژنه‌يل كورد ئيلاميش له كار خوری و چنين قالی و نه‌قش و ره‌نگه‌يل ده‌س باڵايگ داشتن، تا رسيه ئه‌وه‌ك ناوچه‌يل تر جياجيا له‌و كاره بڕه‌سنه‌وه‌و بتوه‌يه‌نن قاليه‌يل ره‌نگامه‌ی ده‌سكرد دروس بكه‌ن و ره‌سمه‌يل گژوگياو گوڵ و نه‌خشه‌سازی جوان و ره‌سم ئاژه‌ڵ و باڵنده‌يش له قه‌يه‌و نه‌خشه‌كيش بكه‌ن.
له‌و شوونه‌وار و ده‌سكرده‌يل كويه‌نيشه ك كه‌فته وه‌رچه‌ومان له موزه‌خانه‌ی لوفه‌ر په‌يكه‌ر ژنيگ ئيلاميه له شار سووسه‌ی كوردنشين، ژنيگه له‌بان ته‌ختيگ نيشتگه‌و خوری چنيد و شيشه‌يگ ها وه‌رده‌می و ماسييگ و خوه‌راك و ميوه‌جات ها له‌تی ك نيشانه‌ی ژنيگ كلتووريه يا ژنيگه له ماڵ پاشايه‌تی ژيه‌يد.
له پشت ئی ژنه دويه‌تيگ واوه‌شينيگ ها ده‌سی، ك يه‌يش نيشانه‌ی وه‌رز تاوسانه يا كه‌ش و هه‌وای گه‌رميگه‌و ئی واوه‌شينيشه له ريشه دروس ئه‌كريه‌يد و تائيسه‌يش له ناوڕاس و باشوور عراق و ئيلاميش وه‌كار ئه‌يه‌رنه‌ی، وه‌لی ئی دويه‌ته ك پشتيه‌و وساگه باڵای له باڵای ژنه نيشتگه‌گه به‌رزتر نيه، ك شايه‌ت نه‌خشه‌سازه‌گه نه‌تواسگه به‌رزتر نيشانی بيه‌يد چوينكه كه‌نيز گه‌وراگه‌يه، يا ئه‌وه‌سه دويه‌ت بويچگيگه‌و قژی فريه هويلان و دريژه و رازياسه‌و وه مجه‌وهه‌رات و واوه‌شينه‌گه‌ی ده‌سيشی چوارگووشه‌س.
ئه‌و ته‌ختيشه ك ئی ژنه له‌بانی نيشتگه كناره‌يل زه‌خره‌فه‌داريگ ديريد له بانه‌و پايه‌يليشی جوور پای شير و چنگڕدار و پڕ تويكه‌و سفره‌يگيش له‌وه‌رده‌م ژنه‌گه دانرياگه‌و پڕه له نه‌خشه‌سازی ك جارجاريگ له‌ی نه‌خشه‌يله له قه‌ی چشته‌يل دروسكرياگ ئاشووری و له خرساباد و نه‌ينه‌وا ئه‌كه‌فيده وه‌رچه‌و له موزه‌خانه‌ی لوفه‌ر و موزه‌خانه‌ی بريتانی.
وه‌ل ئه‌وه‌يشا ئه‌و مادده‌ی كوچگينه ك ئی په‌يكه‌ره له‌لی دروسكرياگه يه‌كيگه له كوچگه‌يل سووسه‌ی نموونه‌يی ك ناوداره له وڵات ناونی دوچه‌مان و ئيلام و گشت ناوچه‌يل خوه‌رئاوای ئيران.
وه‌لی كوچگ قيری ناوچه‌ی سووسه جياوازه‌و كه‌م له‌لی هه‌س له شوونه‌يل تر، ك له هه‌زاره‌ی چواره‌م وه‌رجه زايين له‌لی هاورياسه كار، ك ئه‌كاده وه‌رجه شه‌ش هه‌زار ساڵ و نه‌خشه‌ی پڕ دقه‌ت و جوانيش له‌قه‌ی ئی كوچگه نيشانه‌ی ئاست به‌رزی و سه‌ررشته‌يی فريه‌يگه له مه‌سه‌له‌ی نه‌خشه‌سازی وه شيوه‌يگ ئاشكرا.
له هه‌مان وه‌خت يه‌كيگ تر له تايبه‌تمه‌نديه‌يل ئی كوچگيشه ئه‌وه‌سه وه گه‌رمی كه‌ميگ چاره‌سه‌ر بكريه‌يد ئه‌كريه‌يد وه ئاو ته‌ڵا يا وه نوقره وه‌رگ بگيريه‌يد.
د . موئه‌يه‌د عه‌بدولستار