ئى هووز باوه هه‌رچه‌نى له وه‌رز زمسانان له ئاوایه‌یل خوه‌یان نه‌چینه‌سه شوونه‌یل تر، وه‌لى وه‌خاتر وه‌سه‌ربردن گه‌رماى تاوسان و دابینكردن له‌وه‌ڕگا ئه‌را ڕيه‌ن و په‌س و ئاژه‌ڵه‌يليان به‌شیگ له‌لیان روى كردنه‌سه كویه‌ى شاهۆ و ناوچه‌یل سه‌ریاس و ده‌ورگرد ناوچه‌ى پاوه و به‌شیگیانیش چینه وه‌ره‌و"ته‌په‌ڕه‌ش زه‌هاو، باخ سه‌یخان، مله‌ى سه‌رته‌ك، خه‌ركنێ و چواركڵاو".
بیجگه ئه‌وه‌یش چه‌ن خیزانیگیش له‌لیان له ناوچه‌ى "ده‌روه‌ن ده‌هووڵ" ژیه‌ن له‌نزیك قه‌سر شرین، ك ئه‌يانه وه‌پيان ئویشن بنه‌ماڵه‌ى عه‌بدوڵڵا خدر دو تۆیى.
هووز باوه پیكهاتنه له چه‌ن بنه‌ماڵه‌یگ جوور" بابایى، قازى، ئه‌ڵماسى، جه‌مشیرى، باوه‌لێ، داودى، قویخا فه‌تاح، نه‌ویجانى، وارانى، قادرى و جه‌لیله". ئه‌یانه بڕیگ ئوساى سه‌رڕشته‌كار و ده‌سڕه‌نگین داشتنه له بوار دروسكردن ده‌سهاڕ و ئاسیاو و چشته‌یل تر. جیا له‌وه‌یش گرینگى فريه‌یگیش دانه‌سه كار ره‌سین و چنین و چشته‌یل ده‌سكرد و له هه‌مان وه‌خت شاره‌زایى خاسیگیش داشتنه له دروسكردن قالى كوردى.
ئمجا ئى هووزه گشت وه‌ختیگ وه‌ل كیشه‌ى ره‌واى ملله‌ت كورد بوینه‌و له شووڕش تازه‌ى كوردیش نه‌خش مه‌ردانه‌یگ داشتنه، ك وه‌رده‌وام ناوچه‌گه‌یان شوون وچانداین پێشمه‌رگه‌یل بویه، ك یه‌یش خزمه‌ت فریه‌یگ داشت ئه‌را شووڕش و هه‌ر وه‌و خاتریشه یه‌كه‌مین ناوچه‌یگ بویه ك كه‌فته‌سه وه‌ر په‌لامار جیوازكردن و مه‌ردمه‌گه‌ى له ئۆردگاى زووره‌ملى"زه‌ڕایه‌ن" نیشته‌جى كریان.
ره‌نجده‌ر ئاواره