لەی جەنگە نەینەوا کەفت، ئاشوورییەیل تویش شکستیگ میژوویی بوین و دەسەڵات ئیمپراتۆری ماد فراوانتر بوی.

 هەناێ جەنەگە کۆتایی هات و سەرکەفتنە گەورەگە وەدەس هات، پاشای ماد داوا لە فەرماندەی سوپاگەی کرد چیرووک جەنگە ئەرای بویشێد، لەو وەختە، چوینکە قەیەغە بوی شمشیر و چەک ئەرا دیوان پاشا بوریەێد، سەرکردەیل دەسماڵ سوور لەجیای شمشیر بردن، و نمایش جەنگەگە وە زوان لەس لەوەردەم پاشا وە وەکارهاوردن دەسماڵ و جویلە جەنگردن وە شیوەی سەما و خڕ سەما کردن.

 فەرماندەی یەکەم ک ئیسە لەلای کورد بویەسە (سەرگۆڤەند، سەرچووپی)، دەس گشت سەربازەیل گرد، واتە سەربازەیل فەرمان فەرماندەیلیان و دڵسووزییان ئەرا پاشای ماد نشان دان، ئیجا  دەسکریا یەکەم گامەیل وە شیوەیگ ئارام و هاوسەنگ، کە ئمڕوو وە (گەڕیان) ناسیاگە، واتە جەنگەگە وە ئارامی و وریایی دەسوەپی کرد، ئیجا سەما گەرمەو بوی،  واتە دەسکریا پەلامارداین دوژمن، جویر  ئەو هەڵپەرکە ک لەناو کورد هەس، ک خڕیگ دروس کەن، و وە یەکیگ لە کوینترین سەما میژووییەیل لە جەهان دریەێدە قەڵەم، وە تایبەت سەمای (سێگاڤی، سێگامی، سێپایی) ک وە گامیگ سادە وەروو دویا و دوو گام وەرەو نوا دەسوەپی کەێد، ک وەوە نشان دان چوین لە جەنگەگە دوو گام پەلامار بویە، و یەک گام تەکنیکی وەرەو دویا بویە، و هەڵپەڕکەیگتر هەس وەناو (شاڵان) کە سەرچووپی یا (سەرکردە) قول راسی چەمنێد، ئیجا وەناکاوەو وە تەکانیگ زیاتر سەما کەێد، واتە ئەگەر لە جەنگ تویش زەخمیگ بوین، ویرەدارتر بوون و وەردەوام لە پەلامارەگە لەبان دوژمنەیلمان وە تونی بوون.

دویای ئەو نمایشە، و نشاندان سەرکەفتن سوپای ماد وە جویلەیل (زوان لەش)، پاشای ماد فەرمان دا ک ساڵانە لە گشت بوون و جەژن و ئاهەنگەیل یاد ئی سەرکەفتن گەورە بکریەێد تا  یاد سەرکەفتنەیل ماد ئەرا هەمیشە بمینێد لە یاد دووس و دوژمنەیل.