محه‌مه‌د تاهر كوردی ساڵ 1340 كوچی ، وه‌ل باوگى ڕوێ كردنه‌سه وڵات مسر و ، له زانكوێ ئه‌زهه‌ر ئه‌و وڵاته درێژه داسه خوه‌ندن ، ماوه‌ێ هه‌فت ساڵ له وڵات مسر مه‌نیه ، له‌و ماوه بێجگه خوه‌ندن زانسته ئاینیه‌گان ، چیه‌سه قوتابخانه‌ێ ته‌حسین خوه‌شنویسى و ، خوه‌ى هوكاره‌ى هونه‌ر خوه‌شنویسى وه‌خه‌ت عه‌ره‌بى كردێه.
محه‌مه‌د تاهر كوردی له شوون گله‌و خواردن ئه‌ڕا حجاز ، له شار مه‌ككه‌ى پیروز نیشته‌جا بوێه ، له كه‌رت حكومى(گشتى) دامه‌زریاس و ، ئه‌ركه‌یل فه‌ره‌ێگ جیوه‌جێ كردێه ، له‌وانه : ساڵ 1348 كوچى بویه‌سه فه‌رمانبه‌ر له مه‌حكه‌مه‌ێ شه‌رعى ، ساڵ 1349 تا 1353 كوچى بوێه‌سه ماموستا له قوتابخانه‌ێ فه‌لاح ، ئێكه‌ش بوێه‌سه ماموستاێ قوتابخانه‌ێ سعودیه له شار مه‌ككه و دویاخریش له قوتابخانه‌ى عه‌زیزیه.
محه‌مه‌د تاهر كوردى ، یه‌كێگ بوێه له ئه‌ندامه‌یل لوجنه‌ێ جیوه‌جیكارى فراوانكردن و نوه‌و كردن مزگه‌فت ماڵ خوداى گه‌ورا له شار مه‌ككه له ساڵ 1375كوچى، ساڵ 1383 كوچى خانه نشین كریاس.
محه‌مه‌د تاهر كوردى له بوار هونه‌ر خوه‌ش نویسى ده‌س باڵاێگ داشتێه و ، وه یه‌كێگ له خوه‌ش نویسه ناوداره‌گان وڵات حجاز تێه‌ێگه ئه‌ژمار ، یه‌كێك له شاكاره خوه‌ش نویسیه‌گانێ ، نویسان قورئان پیروز بوێه ، ك له ساڵ 1379 كوچی ، وه‌راوه‌ر ساڵ 1960 زاینی ده‌س كردێه‌سه‌پێ و له ماوه‌ێ سێ ساڵ ته‌واوێ كردێه ، دوێاخر له ده‌زگاێ چاپ و بڵاوكردن قورئان مه‌ككه‌ى پیروز چاپ و بڵاو كریاسه‌و.
محه‌مه‌د تاهر بلیمه‌ت له خوه‌ش نویسى ئه‌وقه‌ره كارێ پوخته و جیاواز بوێه ، به‌هره‌مه‌ندیه‌گه‌ێ ڕه‌سیه‌سه ئاستێگ ك توێه‌نستیه سوره‌تێگ له سوره‌ته كوڵه‌گان قورئان پیروز ، یا چه‌ن ئاێه‌تێگ له بان ده‌نگه برنجێگ بنوێسێگ ، له‌و باره‌وه شێخ محه‌مه‌د نور حعجوم ، ك هاوڕێێگ نزیك محه‌مه‌د تاهر بوێه ، یه‌كێگ له‌و ده‌نگه برنجه‌یله لاێ خوه‌ێ ئه‌ڵگردێه ، ك میژووه‌گه‌ى چوگه‌و ئه‌ڕا 35ساڵ وه‌رجله كوچ دوێاێى محه‌مه‌د تاهر.
محه‌مه‌د تاهر كوردى بێجگه له خوه‌شنویسى ، نوێسه‌رێگ خامه ڕه‌نگینیش بوێه ، ده‌ێان په‌رتوك له بوار خوه‌شنویسى و میژووێى نویساس ك ژماره‌ێه‌یان ڕه‌سێگه 40 كتاو.
میژوو مه‌ككه و ماڵ خودا ، یه‌كێكه له كتاوه‌گانێ ، ك بوێه‌سه سه‌رچاوه‌ێگ میژوویی گرنگ ئه‌ڕا خوازیاران زانین مێژوو شار مه‌ككه و قوناغه‌یل ژیان له تێ.
خوه‌شنویس بلیمه‌ت و نوێسه‌ر وه‌توانا محه‌مه‌د تاهر كوردی ، ڕوژ 23 ڕه‌بیع دوێم ساڵ 1400 كوچى ، وه‌راوه‌ر وه 11ى ئازار ساڵ 1980 زاینى ، له‌شار جه‌دده‌ێ وڵات سعودیه كوچ دویایى كردێه و هه‌ر له‌وره‌یش وه‌خاك سپاریاس.
سه‌رچاوه nrt
ج ك