دکتۆر دڵشاد زاموا، سەرۆک تیم هەڵکەنین لە بەیاننامەیگ رووژنامەوانی کە ئاژانس شەفەق نیوز دیەسەی، راگەیان کە تیمیگ هەڵکەنبن لە پرۆفیسۆر و خوەنەوارەیل کۆلێژ زانستە مرۆییەیل لە زانکۆی سلێمانی توەنستن شوینیگ ئاسەواری کوینە پەیا بکەن کە میژوو سلێمانی ئاڵشت کەێد.
وتیش: لە ماوەی هەفت ساڵ تیم هەڵکەنین توەنستن کۆشکیگ ئاسەواری پەیا بکەن کە میژووەگەی ئەرا زیاتر لە سێ هەزار و ٥٠٠ ساڵ چوودەو ئەرا گەل لولوبییە، کۆشکەگەیش ئاسەواری شار و ئاینی هاناوی.
وتیش: کۆشکەگە ژووریگ تەخت و ژوور ئەمبارکردن و تابلۆ هاناوی کە وە رینویس میخی نویساس و دەق ئایینی و ئابووری هاناوی و موهر سیاسی و ئایینیش لە شوینەگە پەیا کریاس.
وتیش: کەل لولوبی یەکیگن له گەلە کوینەیل ناوچەگە، وە دەقە میخیەیل ناسریانە و لە عراق وەرد کەل سۆمەری و ئاشوورەیل ژیانە.
لەباوەت نوین کۆشکەگە، دڵشاد دووپات کرد کە کۆشکەگە کەفێدە کەنار چەم سەرگەنار لەو ناوچە کە ریوبان و کویەیل لەناوی یەکەو گرن.
سەرچەوە میژووییەیل باس ئەوە کەن کە ناو لولوبیەیل (وە زوان ئەکەدی - لو-لو-بی) لە دەقە میخیەیل وە شیوەی (لولوبی - لولو - لولومی - لولوبوم) هاتگە، و ئەوان بڕیگ هووز کویەنن کە لە هەزارەی سێیەم وەرجە زایینی ژیانە کە لە ئیران کویەن وەرجە ئاریایی لە ناوچەیگ وەپی ئویشن لولوبوم کە کەفێدە ناوچەی ناوەین کویەی زاگرۆس لە شارەزوور (پارێزگاری سلێمانی، عراق) و پارێزگای کرماشان لە ئیران، لولوبیەیل هاوسای سيموروم بوین و جاروبار و هاوپەیمانی بوین، تابلۆ کوینەیل میزۆپۆتامیا نشان وەی کەسەیل کویەییە کەن کە وە “بەربەر” ناویان نریاس.