عه‌لى شیر له هه‌مان وه‌خت كابرايگ زاناو فكرمه‌نيش بويه و هه‌وڵ فره‌یگيش داگه ئه‌را یه‌كخستن ويه‌كڕزی كورده‌یل و كاره‌یل گرنگ و بايه‌خداريش ئه‌را كورده‌یل ئه‌نجام داگه، ئه‌مجا له‌وه‌ر خاتر جه‌مه‌وكردن مه‌ردم له ده‌ور سه‌ید ره‌زا و مقه‌يه‌تيكردن له‌لی هه‌وڵ بیوچانيگ دا.
عه‌لى شیر له ساڵ 1937 هه‌نای ك بڕیار بوى ئه‌را نواگرتن له مه‌سه‌له‌ی كوشتار و خوینڕشیان فيشتر و په‌یوه‌ندیكردن وه‌ل فره‌نسا و ئنگلیز بچووده ئیران یا عیراق، وه‌رجه ئه‌وه‌گ سه‌فه‌ر بكا شه‌و له ئه‌شكه‌فت " ئاگدات " وه‌ده‌س برارزایگ سه‌ید ره‌زا كوشیا، ك خوه‌ى وه بیلایه‌ن نیشان دیاد و له ژیريشه‌و هاوكار توركه‌یل بوى.
له‌ڕاسی كوشیان عه‌لى شیر زه‌ره‌د فريه‌یگ ره‌سانه شووڕش، ئمجا توركه‌يل له وه‌خت جه‌نگ هه‌رچى دارستانه ئاگر دیان و ئاگریش وه‌ردیانه ده‌م ئه‌و ئه‌شكه‌فته‌یلیشه ك هه‌زاران ژن و مناڵ بيتاوان له‌تیان ژیان و ئه‌و خیزانه‌یليشه سزانیان و هه‌ركه‌سیگ له‌لیان وه‌ديل بگرديان یه‌كسه‌ر كوشتیانه‌ى.
سه‌ید ره‌زايش هه‌نای ك چوارده‌ورى گیریه‌ێد و ئابڵوقه دريه‌ێد له لایه‌ن توركه‌یله‌و هه‌وڵ ئه‌وه ئه‌ياد له‌و ته‌وقه ده‌رچوود و خوه‌ی قورتار بكا، وه‌لێ وه كاره‌سات فريه‌یگ ته‌مام ئه‌دێ و نزيكه‌ی هه‌زار كه‌س له‌ده‌س ئه‌ياد، يه‌يش بيجگه ئه‌وه‌گ ژنه‌گه‌ى و یه‌كیگ له كوڕه‌یلى و سێ نه‌وه‌یشى فه‌وتیه‌ن و سه‌ید ره‌زایش وه‌ديل ئه‌گیریه‌ێد.
دی دويای ئه‌وه‌يش وه قسه‌ى كورده‌یل، گوايا والى ئازه‌ربایجان قه‌وڵ وه‌پى داگه ئه‌گه‌ر له حاڵه‌تيگ سه‌يد ره‌زا خوه‌ى ته‌سليم بكا ئه‌زیه‌تى نه‌یه‌ن، سه‌ید ره‌زا ك له 5 سپته‌مبه‌ر ساڵ 1937 زایینى گیریاو له 18ى نۆڤه‌مبه‌ر هه‌مان ساڵ وه‌ل بڕيگ له مه‌ردمه‌گه‌ی دریا له سێداره.
باس له‌وه ئه‌كه‌ن ك نزيكه‌ی 40 هه‌زار ئاده‌ميزاد كورد له شووڕش ده‌رسیم فه‌وتيانه‌و له‌ناو چينه. وه‌ل ئه‌وه‌يشا شووڕشكا‌ره‌یل كورديش له ماوه‌ى ته‌مه‌ن 17 ساڵ ئه‌و شووڕشه ، له ساڵ 1920 تا 1937 وه دڵپاكى و وه‌بى پشتبه‌سانن وه لایه‌ن بیگانه جه‌نگ كردنه‌و ئازایه‌تى فريه‌یگيش نیشاندانه/ ئمجا بیجگه ئحسان نورى پاشا، باقى سه‌ركرده‌یل تر شووڕش یا دریانه له سێداره یا له مه‌یدان جه‌نگ كوشیانه.
دارا سه‌عيد