شەفەق نیوز- ئەوسا دە شان هەر پاتشایێگ، وەزیر، سەدر ئەعزەم یا سەرۆک وەزیرەیل و قەێ‌مەقامێ بییە ک هەکاتی مەسڵەتەی (بەور بان شێر) جوور بەورێ ک زوورێ لە شێرەگە خوەێ فرەتر بییە، ئەویش حوکمێ رەواتر بییە دە وڵات، ک وەێ وتنە شاقولی یانێ شای‌دوێیم ک بان دەس شاگە راسکانییەگە، خوەێ بییە.
شێخ عەلیخان زەنگنە، حاکم کرماشان دە ئەێت شاعەباس دوێیم، پاتشای سەفەوییە ک پیاگ فرە وەکار و کارزانێ بییە و حوکمێ دە وڵات رەوا بییە و شا خوەێیش فرە لایینێ داشتگە ئوو گشت کارەیل نزامی و ئقتسادی و ئداری و دیوانسالاری خوەێ داگە وە دەسێ و وە قەێ‌مەقامی و جیگری شا رەسییە، یەکێ لەو ئایمەیل مێژووسازە بییە.
وتنە ک ئەوی فرە سەختگیرتر لە شاعەباس خوەێ بییە و دە هەر جیێ ک شا وە ول بەزڵ و بەخشش و بڕ و بەش کردگە، شێخ‌عەلیخان نوای گرتگە و ئەڕا یە بییە ک وڵات ناو نازاریێ نانە (شێخ عەلیشا) و لانامێ نانە شاقولی‌خان، یانێ وە راسی ئەوی وە شا ناسینە نە شاعەباس خوەێ.
هێمان ک هێمانە دە نام ئێرانییەیلە و فارسەیلە، یە باوە ک وەختێ کەسێ چشتێ دوەخشێ و یەکێ تر دبێگە داڵێ و دخوازێ ک نوای بگرێ وە تیر و تانە لە بێ‌عورزەێ‌یەری بەخشینەرەگە دویشن:
شا بەخشییە شاقولی‌خان نەدبەخشێ
یا
شا بەخشییە شێخ عەلیشا نەدبەخشێ
ئی مەسڵەتە فرە وە کار دچوو.