له‌ی ئايينه، دوجه‌هان هه‌س، جه‌هانێگ پاك و مسالی و ئه‌و جه‌هانه‌گ ئيسه له ناو ژيان ئه‌كه‌يم. شايه‌د له ئه‌ی ئايينه ره‌گه‌ز و كڕێگ له فه‌لسفه‌ی ئه‌فڵاتون له تێ بوود، چوين ك ئه‌فڵاتون باوه‌ڕ وه بوين دودنيا داشتيه. سائيبيه‌يل باوه‌ڕ وه دۆنای دۆن ديرن، ئيچنه‌يش باوه‌ڕ ديرن ك وه‌ختێگ ئايه‌م ئه‌مريد، روحه‌گه‌ی ئه‌را دونيای تر ئه‌چێد. هه‌ر يه‌يشه ئيچنه كرديه تا باوه‌ڕ وه داشتن قه‌ور نياشتوون و دويای وه‌گ يه‌كێگ له‌ليان ئه‌مرێ، ئه‌خنه‌ی ناوئاوا، هانه بان ئه‌ی باوه‌ڕيشه ك شوون دورووژ روحه‌گه‌ی وه‌ره‌و ئاسمان خوه‌ی ئه‌ڵكيشێد.
دروشم سائيبه‌يل دارێگه ك پارچه‌ێگ حه‌رير به‌سياسه‌و سه‌ريه‌و، ئه‌ی داره ئه‌را سائيبيه‌يل هه چوی خاچ ئه‌را مه‌سيحيه‌يله، وه‌ی داره ئويشن(دارفش). بنه‌مايل ئايينی سائيبی په‌نج دانه‌س. هه‌له سه‌ردا، باوه‌ڕ هاوردنه وه خوادی ته‌ك و ته‌نيا، جيا له‌يه‌يشه سائيبيه‌يل نه‌ماز خوه‌نن و رووژه‌يش ئه‌گرن، رووژانه سێ جار نه‌ماز كه‌ن، له وه‌خت نه‌ماز خوه‌نينيش روی كه‌نه‌و باكوور. چوين ك هانه‌بان ئه‌ی باوه‌ڕه ك دونيای خاس ها له سه‌رو ئه‌كه‌فيده باكوور. ئمجا رووژگ گرتنيشيان وه ده‌م و عه‌قل و وژدان به‌سنه‌ی. ئه‌را نمووونه: ئه‌گه‌ر يه‌كێگ وه رووژگ بوود، بايه‌د وه وژدانه‌و رووژگ بگرێد. ئاموژگاری ئه‌ی دينه ئه‌را په‌يڕه‌وه‌يلێ ئه‌وه‌سه ك له‌وه‌خت رووژگ گرتن، له پشت قاپيه‌و له قسيه‌يل يه‌ك گووش نه‌ته‌كنن و ناده‌يش حه‌سودی له يه‌ك بخوازن.
سائيبه وه دين ئاده‌م ئه‌ناسيه‌يد، ئه‌وان باوه‌ڕ وه يه نه‌ێرن ك پياوه له ژن پاك تره، به‌ڵكو وه چه‌واشه يه، ئافره‌ت پاكتر ئه‌زانن. چوين ئيچنه ئيژن ئاده‌م له خه‌ڕگ دروس بويه، وه‌لی له‌ش داڵگه حه‌وا له ئاده‌م جيا بويه‌سه‌و. وه‌ی مانا ك حه‌وا له باوگه ئاده‌م دروس بويه، وه‌ی مانا ك پاكتره. ئيچنه ئه‌راچينێگ مانای ئه‌و ناره‌سنێد ك ئه‌وان ئاده‌م وه خراوتر ئه‌زانن، به‌ڵكو نوڕسنيان له‌روی دروس بوينه‌گه‌س.
مه‌ندی شوون پيرۆز ئه‌وانه، ته‌مام كتاوه‌يل پيرۆزيان له ناو ئه‌ی جيه كۆوه‌و كريانه، ناودارترين كتاو ئه‌وان،( كنزاربا) ك ماناگه‌ی گه‌نجينه‌ی گه‌وراس.
سائيبيه‌يل ئويشن، كنزاربا يه‌كم جار ئه‌را باوگه ئاده‌م له ئاسمان هاتيه‌سه‌و خوار، ئمجا ره‌سيه‌سه پێغه‌مبه‌ريل تر.
هه‌ر دينێگ بڕێگ گوناهێ دياری كرديه‌و داوا له په‌يڕوه‌يل خوه‌يشێ ئه‌كا ك له‌ليان نزيكه‌و نه‌ون. سائيبيه‌يش كۆمه‌ێگ گوناهێ دياری كرديه، گوناهه‌يل له لايه‌ن سائيبيه‌يل يه‌كم ئه‌وه‌سه ك قسيه وه په‌روه‌ردگار نه‌كريه‌يد، وه مانای ئه‌وه‌گ له ئسلاميش كوفره، له لای ئه‌وانيش هه‌روه‌و جووره‌سه.
ئه‌ڵگه‌رديان له دين سائيبی گوناهێگ تره ك نادێ په‌يڕه‌ويل ئه‌ی دينه، له دينه‌گه‌ی خوه‌يان بچنه سه‌ر دين تر. گوناهه‌يل گه‌ورا تريش كوشتن و درودان و دزی و بوختان كردن و قه‌سه‌م خواردن وه درو، شه‌هوه‌تپه‌ره‌ستی و سحروجادوگه‌ری و سوننه‌ت كردن(خه‌تنه) و شيوانن له‌ش ئايه‌مه.
خواردن مه‌ی له لای سائيبيه‌يل حرامه، هه‌ر ميوه‌گيش فێشتر له ٢٤ سائه‌ت بمێنێد، ئه‌را دوير گرتن له سه‌رخوه‌ش بوين وه حه‌رام ئه‌زاننه‌ی. سائيبيه‌يل رێ وه كوڕ و دويه‌ت خوه‌يان نيه‌ن وه‌ل كه‌سێگ ئه‌و ده‌يشت له دين خوه‌يان هاوسه‌رگيری بكه‌ن، فره كه‌م و ده‌گمه‌ن له ناو سائيبيه‌يل ته‌ڵاق روی ئه‌دا، وه سه‌ر ئه‌ی گوناهه‌يله، سائيبيه‌يل باوه‌ڕ وه ته‌وه‌به كردنيش ديرن.