شه‌فه‌ق نيوز/ عه‌باس قولى خان يه‌كيگه له كوڕه‌رزايه‌يل خان ئه‌حمه‌د خان كوڕ هه‌ڵۆخان به‌نى ئه‌رده‌ڵان له كوردستان، ك دوياى ده‌ركردن كه‌يخوسره‌و به‌گ، ئه‌هل موڵك له‌ساڵ 1121 كووچى ئمتياز حكومه‌ت كوردستان وه‌پى ئه‌يه‌نه.
گشن ئه‌هل موڵك سه‌ر ئه‌را ئى عه‌باس قولى خانه چه‌منن و گووش وه فه‌رمانه‌يلى ئه‌يه‌ن، ئمجا شا سوڵتان حسێن وه له‌وه‌رچه‌وگرتن به‌رژه‌وه‌ندى ئه‌و سه‌رده‌مه وه‌رگ فه‌رمان حكومه‌ت ئه‌راى ره‌وانه ئه‌كاو جنگ فه‌رمانڕه‌وايى ئه‌كاده وه‌رى.
له‌ساڵ 1128 كووچى شا سوڵتان حسێن مه‌سه‌له‌ى كپه‌وكردن ئاگر ئاشووكارى و فتنه‌يى ئه‌فغانه‌يل ئه‌بدالى له دارولمولك قه‌نده‌هار وه عه‌باس قولى خان خه‌ڵك كوردستان سپارێد.
عه‌باس قولى خانيش وه‌ل 8 هه‌زار سوار له كوردستانه‌و كه‌فتنه‌ڕى وه‌ره‌وه شوون مه‌رام، هه‌ناى ك سه‌ربازه‌يل كوردستان ره‌سنه ته‌هران شيوياگى و تێكچن سه‌ڵته‌نه‌ت شا سوڵتان حسێن ئه‌رايان ده‌ركه‌فێد و له عه‌باس قولى خان هه‌ڵه‌وگه‌ردن و گله‌وخوه‌ن ئه‌را كوردستان.
ئمجا عه‌باس قولى خان وه ته‌نيا ئه‌چێده حزوور شا سوڵتان حسێن و باس ئى كرده‌وه‌و تومه‌ت گله‌وخواردن سوپاگه‌ى ئه‌خاده پاڵ عه‌لى قولى به‌گ كۆڕه‌رزاى كه‌لبعه‌ليخان به‌نى ئه‌رده‌ڵان ك گوايا ئه‌و بويه‌سه هووكار گله‌وخواردن سوپاگه‌ى.
شا سوڵتان حسێن ئى عه‌باس قولى خانه له‌بان كار لاوه‌ێد و ئه‌خاده‌ى زيندان، ماوه‌ى حوكمڕانيه‌گه‌يشى 8 ساڵ بوى، ئمجا هه‌مان ئه‌و عه‌لى قولى به‌گ نه‌ناسرياگه ئه‌كاده حوكمڕان كوردستان و جنگ حكومه‌ت و فه‌رمانڕه‌وايى ئه‌كاده وه‌رى و نازناو خانيش ئه‌راى نه‌ێد جوور حورمه‌تيگ و هه‌ر وه‌و خاتريشه وه‌ل عه‌ليخان فه‌راشخه‌لوه‌ت وه سه‌رفرازيه‌و ره‌وانه‌ى ئه‌كا ئه‌را كوردستان.
عه‌لى نه‌قى ئه‌لحوسه‌ينى