سوبحان ويرديخان هه‌وڵ فريه‌يگ دا ئه‌را فراوانكردن شار سنه و ئاوه‌دانكردن و خاسسازيكردن (دارولعماره)ك ماناى باڵه‌خانه‌ى حكومه‌ت و حكمڕانيه.
له‌ساڵ 1147 كووچى، نادرشا وه مه‌رام داگيركردن(شيروان) له ئه‌سفه‌هانه‌و كه‌فته‌ڕى، له 18 سه‌فه‌ر هه‌مان ساڵ هاته ناو شار سنه‌و له ديواخان روى له باكوور باڵه‌خانه‌ى حكومه‌ت داوه‌زى ك ناسريا وه باڵه‌خانه‌ى(روى له ته‌په)و له‌و سه‌رده‌مه دريژيه‌گه‌ى 20 گه‌ز و پانيه‌گه‌ى 12 گه‌ز بويه.
نادرشا له‌ورا ڕى ئه‌ياد سه‌ردانى بكريه‌ێد و روى ئه‌كاده ويرديخان فه‌رمانڕه‌واى كوردستان ك له به‌ش خوارگ ديواخانه‌گه وسياوێدو وه‌پى ئويشێد: سوبحان ويرديخان ئيمه ناتيمنه شوونه‌گه‌ى تن داگير بكه‌يم، ديواخان ئيوه فريه گه‌وراس، با لايگى بدێده شوون دانيشتن ئيمه‌يش ئه‌را ئه‌وه‌گ خه‌ريك سه‌ڵته‌نه‌ت بويمن و ئه‌و لاگه‌يشى با ماڵ ئيوه بوود و حوكمڕانى خوه‌دان بكه‌ن.
دى له پاداش ئى حورمه‌تگرتنه نادرشا 14 هه‌زار مه‌ن ڕوين و 10 هه‌زار تومه‌ن ته‌ڵا پيشكه‌ش ئه‌كاو ئه‌ياده‌ى سوبحان ويرديخان.
وه‌هه‌ر حاڵ دوياى ئه‌وه‌گ نادرشا له(شه‌وال 1148)كووچى له بياوان(موغان)تاج ناسه‌ر، دى وه‌فه‌رمان ئه‌و پاشا سوبحان ويرديخان والى كوردستان له‌بان كار لاورياو(مسته‌فا خان)براى سوبحان ويرديخان كريا والى كوردستان.
وه‌ى جووريشه ماوه‌ى حوكمڕانيه‌گه‌ى سوبحان ويرديخان (5)ساڵ و(8) مانگ بوى، ئمجا مسته‌فا خان رويكرده حكومه‌ت سنه‌و له(محه‌ڕه‌م 1149)ره‌سيه باره‌گاى ئه‌ياڵه‌ت و دوياى سێ – چوار مانگ ئه‌هل موڵك له‌دژى ده‌سكردنه راپه‌ڕين و سه‌له‌نوو سوبحان ويرديخان له هه‌مان ساڵ كريا فه‌رمانڕه‌واى كوردستان.
نادرشا دوياى گله‌وخواردنى له گه‌شت هندستان و چگنى ئه‌را گرتن(خواره‌زم)و ئامووژگاريكردن هووز(بارس)و والى ئه‌و مه‌مڵه‌كه‌ته، له‌ساڵ 1150 كووچى سوبحان ويرديخان والى كوردستان چڕيه په‌ناى خوه‌ى و(ئه‌حمه‌د سوڵتان)كوڕ سوبحان ويرديخان كره حوكمڕان كوردستان ك له گه‌شته‌يل هندستان له‌گشت شوونيگ جوور سه‌ركه‌فتنه‌يلى ياوه‌رى بوى.
هه‌ر وه‌و خاتريشه وه ناسناو(خان) سه‌رفرازى كرد و دوياخريش شوونه‌يل وه‌رفراوانيگ خسته ژير ده‌سڵاتى و دى وه‌و جووريشه ئه‌تويه‌نيم بويشيم ك ماوه‌ى حكومه‌ت دويه‌م سوبحان ويرديخان په‌نج ساڵ بوى وه ته‌مامى.
عه‌لى نه‌قى حوسه‌ينى