له‌و وه‌خته‌يليشه ناكووكييگ روێدا له‌ناونى فه‌يليه‌يل و توركه‌يل له‌بان ناوچه‌ى "مه‌لختاوى" ، ئمجا والى توركه‌يل ك له‌لايه‌ن سوڵتان عه‌بدولحه‌ميد دويه‌م دامه‌زريا باس له‌وه كردياد ك موڵكيه‌ت ناوچه‌گه سه‌ر وه ولايه‌ت توركه‌يله‌و له هه‌مان وه‌خت والى پشتكويه‌يش مكوڕ بوى له‌بان موڵكيه‌ت ناوچه‌ى مه‌لختاوى، چوينكه به‌شيگ بوى له پشتكويه.
هه‌ر وه‌و خاتريشه ناكووكى و دوشمنايه‌تى تونيگ كه‌فته ناونى هه‌ردوگلا تا ماوه‌يگ، ئمجا توركه‌يل كه‌فتنه هه‌وڵ داناين پلان ئه‌را په‌لامار سه‌ربازى وه‌خاتر داگيركردن ناوچه‌گه‌و گشت ناوچه‌يل پشتكويه، ك هه‌ر وه‌و خاتريشه توركه‌يل سوپايگ پڕچه‌ك و ته‌قه‌مه‌نى ئاماده كردن و خستنه‌ى ڕى وه‌ره‌و مه‌رز.
غوڵامڕه‌زا خان والى ئيلام وه كاره‌گه زانست و فه‌رمان دار هيز و پياوه‌يل و هووزه‌يل فه‌يلى روى وه‌ڕوى داگيركارى توركى بوونه‌و، ئمجا " جواد خان " مه‌موو خوه‌ى كرده سه‌ركرده‌ى گشتى له‌بان هيزه‌يلى و شماره‌ى جه‌نگاوه‌ره‌يليشى له 5000 فيشتر بوين له‌ناونى سوار و پياده، ئه‌و له‌شكره كه‌فته‌ڕى ئه‌را روى وه‌ڕوى بوينه‌وه‌ى دوشمن وه دڵيگ پڕ باوه‌ڕ و تواناى خاسيگه‌و وه‌خاتر وه‌رگريكردن له خاك و نيشتمانيان.
له‌و وه‌خته‌يليشه هيزه‌يل تورك هاتنه مه‌رز و ده‌سكردنه په‌لامار، وه‌لى له‌شكر پاڵه‌وان كورده‌يل فه‌يلى وه‌گشت ئيراده‌يگ روى وه‌ڕوى ئه‌و په‌لاماره بوينه‌و له‌گشت لايگه‌وه‌و ئه‌را ماوه‌ى 4 سه‌عات وه‌رده‌وام بوين له جه‌نگ وه‌بى وسيان، ئمجا له هه‌مان وه‌خت كورده‌يل فه‌يلى پلانيگ ئه‌را خوه‌يان دانان و دوشمن نه‌زانست شماره‌يان چه‌نيگه.
له ئاكام ئه‌و جه‌نگه هيزه‌يل توركى ئابڵوقه دريان و فريه‌يگ له‌ليان كوشياو زه‌خمدار بوين و ئه‌وه‌كيش له‌ليان مه‌ند له جه‌نگ واين و خوه‌يان كيشانه‌و، وه‌لى فه‌يليه‌يل وه‌بان ئه‌وه‌يشه‌و هه‌ر واز ناوردن و نانه شوونيانه‌و تا وه ته‌مامى له‌ناوچه‌يليان دويريانه‌و خستن و شماره‌ى فريه‌يگيش له توركه‌يل وه‌ديل گيريان و ره‌وانه‌يان كريا ئه‌را باره‌گايه‌يل نزيك ئيلام.
والى ئيلام له‌ى حاڵه‌ته فه‌رمان دا ده‌رسيگ نيشان ئه‌و توركه‌يله بيه‌ن تا جاريگتر نه‌ويرن نزيك ناوچه‌يل پشتكويه بوونه‌و، وه‌لى وه‌ل ئه‌وه‌يشا له‌ى جه‌نگه فه‌يليه‌يل شماره‌يگ شه‌هيد داو بوينه قوربانى خاك و نيشتمانى.
دوياخريش ئه‌و ناوچه‌يله ك زويتر له‌ژير ده‌سڵات توركه‌يل بوى تيكه‌ڵ وه ناوچه‌يل تر پشتكويه كرياو ئه‌و جه‌نگيشه ك روێدا له‌ناونى فه‌يليه‌يل و عوسمانيه‌يل تا رووژ ئمڕوويش هه‌ر باس ئه‌كريه‌ێد له پشتكوو له‌لايه‌ن پياوه‌يل گه‌وراى وه‌ساڵاچگ ك چوين توركه‌يل ده‌ركريانه له ناو خه‌يليان وه فه‌رمان غوڵامڕه‌زا خان والى ئيلام.
حه‌سه‌ن فائز ئه‌لعه‌له‌وى