شه‌فه‌ق نيوز/ پاشایه‌یل به‌غدا له‌ناونى ساڵه‌یل 1757 تا 1773 هه‌ر یه‌كیگ له‌لیان وه‌جووریگ حوكمڕانى كردیاد، له‌ى باوه‌ته‌و "لوریمر"مێژوونویس له‌كتاو"دلیل الخلیج"له به‌ش مێژوويى باس له‌وه كردگه ك ده‌سڵات "بابولعالى" نه‌تویه‌نستگه ده‌س له كاروبار ئه‌و پاشایه‌یله ئه‌ڵگرێد ك حوكم عراق عوسمانى كردیان وه‌گشتى، وه‌لێ ئافره‌تيگ وه‌ناو "عه‌دیله خانم" ته‌شیه‌گه وه‌ده‌س خوه‌یه‌و بویه‌و جوور به‌ن چه‌ن پاشایگ ره‌سیاد، له‌وانه‌یش:
* سلێمان پاشا: ئى سلێمان پاشا هاوسه‌ر عه‌دیله خانم بوى و له‌لایه‌ن بابولعالیه‌و پشتگیرى كریا ئه‌را پاشايه‌تى به‌غداو تارووژ مردنيشى له14ى ئایار 1762 هه‌ر له‌پۆستگه‌ى وه‌رده‌وام بوى. سلێمان پاشا له‌ماوه‌ى ده‌سڵاتى زوورم هووزه‌یل عه‌ره‌ب جوور دوشمنيگ كه‌وڕخن زانستنه‌ى، وه‌تایبه‌ت ئه‌وانه‌گ كار دزى و تاڵانى كردیان، چوینكه وه‌ته‌مامى ده‌س گردویده بان حوكم وئداره‌ى وڵات، له‌هه‌مان وه‌خت وه‌پيشى وتیان "ابو اللیل" و له‌به‌غدایش وه‌پى وتیان "سلێمان شیر"، وه‌لێ عه‌دیله خانم هاوسه‌رى ده‌خاڵه‌ت فريه‌یگ له‌كاره‌یلى كردیاد و دوشمنایه‌تى فريه‌یگيش ئه‌ڕاى دروسكرد.
*عه‌لى پاشا : یه‌یش تویه‌نست له‌ڕى پیشكه‌شكردن به‌رتيله‌و ئه‌را وه‌رپرسه‌یل بابولعالى پۆست پاشایه‌تى وه‌ربگرێد، ئه‌ويش له‌وه‌ر ئه‌وه‌گ له‌ماوه‌ى پاشایه‌تى سلێمان پاشا هاوكارى فريه‌یگى كردیاد وه‌خاتر مه‌ندنى له‌ته‌خت پاشایه‌تى، وه‌لێ ئه‌فسه‌ره‌یل گه‌ورا نه‌تواسنه‌ى هه‌ر له‌وه‌ر ئه‌وه‌يش وه ده‌سایس عه‌دیله خانم ده‌سكرده كوشتن فريه‌یگ له‌لیان و دویاخریش زاڵ بویه بان بارودوخه‌گه، وه‌لێ ماوه‌ى ده‌سڵاته‌گه‌ى ته‌نیا (2)ساڵ دریژه داشت و هه‌ر وه ده‌سايس عه‌دیله خانم كووتایى وه ده‌سڵاته‌گه‌ى هات.
* عومه‌ر پاشا : ئى پاشا له‌بان داواكارى بڕیگ له سه‌رۆك هووزه‌یل به‌غداو ناوداره‌یل شاره‌گه هه‌ڵوژریا ئه‌را وه‌رگرتن پۆست پاشایه‌تى به‌غداو پشتگیرى فريه‌یگى كردن و بابولعالى ره‌زامه‌نى خوه‌ى له‌بانى نیشانداو حوكمه‌گه وه‌رگرت.
عومه‌ر پاشا مامه‌ى عه‌لى پاشا بوى هاوسه‌ر دویه‌م یه‌كیگ له خوه‌یشكه‌یل عه‌دیله خانم بوى ك له‌بان داواكارى عه‌دیله شویه یه‌كه‌مینه‌گه‌ى كوشت و له‌بان ئه‌وه‌یشه عه‌دیله خانم هه‌ر وه‌پى ڕازى نه‌وى ئه‌را پاشایه‌تى به‌غدا.
وه‌ى جووره عه‌دیله خانم تویه‌نست له‌ماوه‌ى 16 ساڵ ده‌ور خوه‌ى بڕانێد و ده‌خاڵه‌ت وه‌كاره‌یل فريه‌یگ كرد، وه‌لێ نه‌ڕه‌سیه ئه‌وه‌گ ره‌زامه‌نى ملله‌ت وه‌ته‌مامى بارێده ده‌س و هه‌میشه دوشمنایه‌تى دروسكرد له‌ماوه‌ى ئه‌و 16 ساڵ پاشایه‌تیه ك ده‌ور له‌تى داشت.
جه‌مال ئه‌ركه‌وازى