له سه‌ره‌تای ئه‌ی نويسريايه، ئه‌خوازيم وه يه ئيشاره بكه‌يم ك مه‌دره‌سه‌ی له ئه‌ی شاره وه ناو ئه‌حمه‌ديه هه‌س ك ته‌مه‌نێ ئه‌چێ ئه‌را سه‌دساڵ و يه له حاڵێگه ك له به‌غدا حوسينيه‌ی هن كورده‌يل فه‌يلی هه وه ئه‌ی ناوه(ئه‌حمه‌دی) هه‌س و نا‌زانم ئه‌ی دو شوونه وه‌ل يه‌كا په‌يوه‌ندی ديرن يا هه ناوه‌يليان چوی يه‌كه!؟.
موسته‌فا ئبن ئه‌بی به‌كر گورانی(١١٤٧ -١١٩٨ كۆچی) له حه‌له‌ب هاتيه دی، يه‌كێگ له ناوداره‌يل نويسه‌ر و شاعير حه‌له‌ب وه هساو ئه‌ياد.
ئه‌حمه‌د بن ئه‌لياس كوردی يه‌كێگ له شاعيره‌يل ناودار حه‌له‌ب نازناو قاموس له‌سه‌رپا درياسه پێ، باوه‌گيشێ له كورده‌يل ناوچه‌ی شه‌هروز بويه. چووده ده‌ميشق و له مه‌دره‌سه‌ی سه‌نيساتيه له‌ژێرده‌س مامۆستايلێ چوين شێخ ئه‌حمه‌د مه‌نينی په‌روه‌رده‌ی شيعر دوينێد.
ئمجا له دويا ده‌ميشق، سه‌فه‌ر وه ئيستانبۆڵ ئه‌كاو بووده ئه‌ندام سوپای عوسمانی و له ئيستانبۆڵ كل كريه‌يد ئه‌را ترابلۆس و له‌وه‌ر ئمجا ده‌س ئه‌كا وه نويسان شيعر، له ئه‌ی شاعيره فره هۆنراوه وه جی مه‌نيه.
ئه‌بوبه‌كر گورانی يه‌كێگ له ئه‌ديبه‌يل ناودار حه‌له‌به، له لای عومه‌ر شه‌ريف خه‌فاف و ئيسماعيل مه‌واهبی خوه‌نين و نويسان يای گرت. بويسه مه‌ڵابنويس دادگا له حه‌له‌ب و له سه‌رده‌م حوكمڕانی راغب پاشا(١٢٢٧ كۆچی) چوی دادوه‌ر دادگای حه‌له‌ب ده‌س نيشان كريه‌يد. بێجگه كار دادوه‌ری وه نويسانن شيعر خوه‌ی وه‌رداوه‌می ئه‌داو له‌ليشێ فره نويسريای مه‌نيه‌سه جی.
موسته‌فا بن ئه‌بی به‌كر گوران، ئه‌ديب و شاعير كورد حه‌له‌ب، بێجگه له زووان كوردی و عه‌روی، زووان توركيش زانسيه‌و وه‌پێ قسيه كرديه.
محه‌مه‌د بن ياسين ئه‌فه‌ندی گورانی يه‌ك تره‌ك له شه‌خسه‌يه‌ته‌يل ناودار حه‌له‌به ك له سه‌رده‌م ده‌سڵات ئ‌براهيم پاشا كار هه‌ڵه‌وگه‌رهدان يا ته‌رجومه كرديه‌و دويای يه‌يشه چوی نويسه‌رێگ له ئه‌نجوومه‌ن ده‌وڵه‌ت دامه‌زريايه. ئمجا له دويای يه دۆگه قائم مه‌قام شاره‌يل ته‌رتوس، مرسين و ئه‌نتاكيه.
شێخ عه‌بدلسه‌ميع كوردی له كورده‌يل ئاوايی جه‌بار له ناوچه شه‌هروزه، له لای شێخ عه‌بدولقادر بێاری كوردی و شێخ عه‌وڵای وه‌له‌ری و شێخ عه‌بدره‌حمان سه‌جوه‌ينی زانين خوه‌ی يای گرتيه‌و له لای مه‌لا كه‌چگه ئه‌به‌لی زانست هساره‌ناسی په‌روه‌رده ديه، ئمجا له مه‌ده‌رسه ئه‌حمه‌ديه كار مامۆستايی كرديه.