شەفەق نیوز/ لە دامەزراو شەفەق نیوز ئەرا رووشنهویری و راگەیانن، شمارەی نوو (251) لە گۆڤار فەیلی ئەرا مانگ تشرین دویەم/ نۆڤەمبەر 2024 هاتە دەر.

شمارەی نوو گۆڤار فەیلی بڕیگ باوەت سەرەکی هەڵگرد کە لە چین ناوخوەیی و هەرێمی گرنگە، و لە دیارترین ئەو باوەتەیلە: 

بڕیارەیل کوتوپڕ.. سزەمەنی قەیرانەیل لەناو عراق: وتاریگ دەسوەپیکردن ئەرا سەرسنویسەر عەلی حسێن فەیلی، کە باس ئەو بڕیارەیلە کەێد کە لەلایەن حکومەتەیل عراق دریەن، و چوین پاپەی دادپەروەری و بەرژەوەنی گەل وەبان بەرژەوەنی سیاسی نیین، کە هیلێد ژاوەژاو سیاسی لە وڵات بەرزەو بوود.

حەیدەر ئاباد، ئاواییگ لەناوڕاس رەنگینی سروشت ئیلام فەیلی: وتاریگ باس ئی شار رەنگینە کەێد لە ئیلام، کە شوینیگ جیاوازە ئەرا گەشتیارەیل وە رەنگینی بووسان و بەرهەمەیلی و جیاوازی خەڵک ئاوایەیلی.

زاڕووەیل عراق کەفنە وەر دەسدرویژیەیل رخداریگ و داوای پابەندی وە رێککەفتنەیل ناودەوڵەتی: ئی وتارە باس ئەو رخەیلە کەێد لەڕوی مناڵەیل عراق لەی ژینگە کە چەک لەناوی زاڵەو بوود و سام یاسا نیەمینێد، و گیچەڵەیل سیاسی و ئابووری و کۆمەڵایەتی لەناویان سەختی وەدەسهاوردن دەرفەتەیل خوەنەواری و چەودیاریکردن تەندروسی گونجیاگ، و لاوازی ئەو یاسایلە کە ریگری لە بەدوەکارهاوردن مناڵەیل و تونوتیژی وەبانیان کەن لەناو و دەیشت خیزانەیل.

لە دهۆکەو وەرەو ئەهوار ناسریە، هونەرمەنیگ کەرکوکی دووس زنیکردن شارستانیەت و سروشت وە شیوەیلیگ هونەری دیرێد: ئی راپۆرتە باس هونەرمەن عادل حاجی بەکر کەێد کە خەڵک شارە کەرکوکە، و بەهرە لە پەیکەرسازی بویچگ دیرێد کە هویردیی فرەیگ لە کار خوازێد، وەگەرد وەکارهاوردن ئەندازیاری و دیزاین و پەیمانەکردن ئەرا دروسکردن تابلۆیل رەنگینیگ هەکاتی بەشیگ لە میژوو و شارستانیەت عراق و ڕەنگینی سروشت هەرێم کوردستان.

یەهودی و فارسی دڕندەترن.. چیرووک مارگریگ لە شار زاڵەیل (جبابرە)ی میژوویی لە عراق، ئی راپۆرت تایبەتە وە گۆڤار فەیلی باس ئەو گەنج راوچیە وەناو ئەحمەد سوڵتان کەێد، خەڵک پارێزگای سەڵاحەدین، لە ئاوای مسەحەگ میژوویی کە رخدارترین گیاندارەیل لەبان زەوی گرێد، کە مار ژەهردار بکوشە.

هەراسانکردن ئەکادیمی.. سێکس وەرانوەر سەرکەفتن کەسەیل دامودەزگایل زانستی لە عراق لە وەردەم کۆمەڵگا دەسپاچە کەێد: ئی راپۆرتە باس ئی دیاردە کەێد کە وەشیوەی وەرچەویگ دەسکردە بڵاوبوین کە هەراسانکردنە وە مامووستایل وە دویەتەیل خوەنەوار لەناو زانکۆ، کە رخیگ گەورە لەبان ریڕەوی خوەنەواری لە وڵات دروس کەێد.

هەرویلک شارستانیەت جویر نموونە.. توێژینەوەیگ لە عراقەو دەسکەێد وە مقیەتیکردن ئاسەواری میژووی ئەگەر وە سوپایش بوییە: ئی راپۆرتە باس ئەو توێژینەوەیگ وەلایەن پەیمانگەی "تريندز ئەرا توێژینەوە و سڵاکاری" کەێد کە رووشنایی خەێدە بان سەختیەیل مقیەتیکردن کەلەپوور کەلتووری لە عراق، و پێشنیارەیل مقیەتیکردن میراتی عراق لەناو جەنگەیلی، لەناویان پەنابردن وە بڵاوکردن پاسەوانی سەربازی.

تەڵەسم خەڵەتانن.. گۆڤار فەیلی ئاشکرای کەڵافە پرسەیلیگ کەێد کە گیرفان عراقیەیل قویتا دەێد: راپۆرتیگ تایبەت لەبان ئەوەگ سەرچەوەیگ حکومەتی ئاگادار ئاشکرای کرد، لەبان پرسیگ گەندەڵی لە وەرگردن کرای وزە لەناو هوتێل و مۆڵەیل و کۆمەڵەیل بازرگانی لە بەغدای پایتەخت، کە مانگانە ملیارا دینار لە بۆشاییەیل ئیداری گوما بوود.

 نەفت عراق ناوەین دوو پەسەنکاری، ئەژدیهای چینی لەناو مەیدان، و تەمای حکومەتی وەرەو خوەرئاوا: ئی راپۆرتە باس ئارەزوو وڵات چین کەێد کە کی نەشاریاسەو، ئەرا زاڵبوین وەبان کێڵگەیل نەفتی لە عراق و هاوماڵیکردن وەرد هاوبەشەیلی لە مووڵەتەیل هەر ماوەیگ جاریگ، ئەرا وەدەسهاوردن شایستەیلیگ گەورەتر و سوودگردن لە کیشان کۆمپانیایل خوەرئاوایی لە بەشیگ لەو شوینەیلە.

ئی باوەتەیلە و پرسەیلیگ ترەک، رووشنایی خەنە بان سەختیەیل ئابووری و ژینگەیی و کۆمەڵایەتی و سیاسی لە عراق و هەرێم کوردستان، وەگەرد راپۆرتەیلیگ تایبەت لەبان کەلەپوور و میژوو عراق.