هه‌ر شه‌و ئه‌تر شه‌و بوو ده‌ی
شیوه‌ی وه‌فر شاهوو ده‌ی
دار نه‌زه‌ر كه‌رده‌سه
ئاهوو ویڵ له هه‌رده‌سه
به‌ڕه‌زای زاخه له‌یلی
وه‌فر ئیڵاخه له‌یلی
***
له‌یلی وه‌و شهویْ گرانه‌و
كویزه‌ی گرتیه وه شانه‌و
گل خوه‌ی وه كیه‌نیه‌گانه‌و
تیه‌نی ئه‌زره‌ت مه‌نه‌ین
شیت زه‌رده‌خه‌نه‌ین
دار گوڵینه له‌یلی
به‌رز و بڵینه له‌یلی
***
شه‌ماڵ ده‌ور ملی كه‌نیه‌و
سروه زوڵفانی چنیه‌و
سووه‌یل گرته‌ی له خنیه‌و
خنیه خوین زاواسه
زاوا ماڵی ئاواسه
داوه‌ت دویره له‌یلی
میه‌وان سویره له‌یلی
***
له‌یلی له‌و لیو تیه‌نیه
كه‌وشه‌گانی كه‌نیه
تیه‌نی نقره ژه‌نیه
تیه‌نی قوڵپ دا له ماسی
وڵات وه‌ر كرد له خاسی
بوو گوڵ یاسه له‌یلی
نوور خوداسه له‌یلی
***
كویه‌یل تووڕ كه‌و كیشان
پوینگه‌یل چه‌تر خه‌و كیشان
چه‌مه‌یل مانگه‌شه‌و كیشان
خه‌و شكیا له چه وه‌یلم
گوم بوی په‌ری خه وه‌یلم
خه‌یاڵ شه‌و بوی له‌یلی
هه‌رچه بوی خه‌و بوی له‌یلی
داوْڵ
له‌ی هه‌مگه مه‌له ڕه ی بوين وه لامه‌و
نیه زام شیوه‌ی ت ْ‌بێشتر ها كامه‌و؟!
هه‌ر كه‌س له‌ی دنیا شیوه‌ی گوڵ دیری
له گشتی بیشتر ژان له دڵ دیری
هه‌ر كه له‌ی دنیا زه‌ڕه‌ی شیرینه
ئۆخه‌ی نیه‌كه‌يدن له‌ی سه‌رزه‌مینه
بی هاز و بی نز چوی پوش وه پاوه
قرچه‌ی گیانم تێ وه ده‌س واوه
ئرمیسم نزاو تیه‌نی بی نزه
بژانگم په‌رچین باخ پایزه
وه داوڵه‌یل بویش له زووانی م
یه‌ی ڕووژ كاڵه‌و بوون چوی جوانی م
قه‌ڵاگان زانن داوڵ داڕزیه‌ی
وینه‌ی سه‌وزه وشك تاوسان سزیه‌ی
له بریجه‌ی خوه‌ر تانكیش بوو گیانی
وه پاوه مری و كه‌سی نیه‌زانی
له من ڕیقه‌ی ڕه‌ق سقانی مینی
له داوڵ چوو وشك بی گیانی مینی
دویهتْ خانْ كه‌ڵڕ
یه تویل سه وز لیو تیه‌نی
یا قامهتْ شمشاڵیگه
یه هه‌رچی هه‌س مناڵیگه
كه‌ژاڵ چه‌وه‌یل كاڵیگه
نازارْ گه‌ورا ماڵیگه
***
یه دویه‌ت خان كه‌ڵهڕه
زڵفی چوی به ره‌فتاو خڕه
ئی چه‌و ڕه‌نگین ده‌م زڕه
ته‌نیا دار قه‌ی پاڵیگه
نازارْ گه‌ورا ماڵیگه
***
كوڕهیلْ ئیڵ لیوه‌ی بوينه
شیت و شه‌یدای شیوه‌ی بوينه
مه‌س له بوو زه‌رده‌به‌ی بوينه
یه خوو هیمان مناڵیگه
نازار گه‌ورا ماڵیگه
***
ئی بوو خوه‌شه زه‌رده‌به‌یه
ك تێ له‌و چاك یه‌خه‌یه
كه‌ی بوو به‌یه، یه بوو خوه‌یه
یه په‌روانه‌ێ خاڵ خاڵیگه
نازارْ گه‌ورا ماڵیگه
***
ئی قوو نه‌رم بان شه‌ته
مه‌ردم ئویشن ته‌نیا دویه‌ته
كه‌وكه، سه‌ێره‌س، قووه، به‌ته
یه هه‌رچی هه‌س خه‌زاڵیگه
نازار گه‌ورا ماڵیگه