وه‌ ئیره‌ نیه‌تویه‌نم به‌یت كویه‌كه‌نین بویشم

ژه‌ ئه‌وسا ك ده‌فته‌ر خیاڵم ڕچگیاسه‌ وه‌ یه‌ك

ئشكیاس لق كونارم وه‌ به‌ردپه‌ڕان شه‌و

كوڵه‌با ڕچگیاسه‌ و هه‌واڵم ڕچگیاسه‌ وه‌ یه‌ك

نیشتنه‌سه‌ قوڕ ئاساره‌یله‌گه‌ى سس به‌خت

خوه‌ر هه‌ڵاتن مه‌جاڵم ڕچگیاسه‌ وه‌ یه‌ك

‌‌‌وه‌ ته‌ینا گیان ده‌م وه‌ ئشاره‌ى كلگیگ

دى ئاگر كوانى ماڵم ڕچگیاسه‌ وه‌ یه‌ك

داڵگه‌ ئه‌ڵس ژه‌ خاو، په‌لد ئڕام بووڕ

شیپه‌گه‌ى بوور كه‌ژاڵم ڕچگیاسه‌ وه‌یه‌ك

ڕمیاسه‌ ئاسمان ژه‌ بى په‌ڕ و باڵى مه‌ل

باڵنده‌ى هه‌ردو باڵم ڕچگیاسه‌ وه‌ یه‌ك

ناڵه‌یگ ته‌ڕ نه‌كرد لیو  هویشك ئاشقیگ

به‌ڵاڵ سه‌وز چه‌و كاڵم ڕچگیاسه‌ وه‌ یه‌ك

شه‌نكه‌ر (بیداد) خه‌رمان هاواریگ شه‌ن نه‌كرد

هیڵ  نه‌رم  شیعر كاڵم  ڕچگیاسه‌  وه‌ یه‌ك

چم ك چاره‌یگ بكه‌م، هه‌تاو بكیشم وه‌ كووڵ

هه‌ر چه‌ن ك دى شوور و هاڵم ڕچگیاسه‌ وه‌ یه‌ك