***
بيــــــلا بزانيم ڕازه‌يلى چه‌سه
ئى ڕازفرووشه ، جـوور قومچه‌سه
خاڵوو ڕيچه‌رمـگ، پرسيارى كرد
دى ئى ڕازفرووشه هالى به‌چه‌سه
بيــــــلا بزانيم، ڕازه‌يلى چه‌سه
***
م يـه‌ى ڕازى توام، پڕ بووگ له ناز
له بوو بوراق و شـه‌ونم، بويه ساز
ديريد وه‌ى ڕازه، ئه‌ى ڕوى جوانـم؟
ئه‌گه‌ر نه‌يريدن .. كار نه‌يرم له ڕاز
م يـه ڕازى توام پڕ بووگ له ناز
***
ئى ڕازه ديريـــد، له جوورى بويه
گوڵه‌يل بچنيد له سه‌ر هه‌فت كويه
حـه‌مريـن بيله جى... ئه‌را پشتـكوو
قـايم خوه‌د بگـر له عه‌قڵ و سويه
ئى ڕازه ديريــــد له جوورى بويه
***
يه له‌يرا نييه ... ئـى ڕاز و داده
مه‌ر ها لاى شيرين، و دڵد فه‌رهاده
بچووه بان ئه‌لبورز... و كنـار سينا
ته‌په‌يـل نه‌جــد و، ديدار ســاده
يه له‌يرا نى يه ... ئـى ڕاز و داده
***
كه‌شكووڵ بنه شان، و ره‌خت ده‌وريشى
به نـاو ده‌ريـا و، له زه‌وى نه‌نيشى
فيَـر له‌يــلا كه و، زوڵفه‌يل شيرين
ئى ڕازه بايـــــه‌ت، جه‌ورى بكيشى
كه‌شكوول بنه‌شان و، ره‌خت ده‌وريشى
***
بـجم له سـه‌حرا، له سـاى باخه‌يل
كه‌شكووڵد پڕ كه، له ناڵه و داخه‌يل
ئـى ڕاز تنـــه ... خوه‌ى جه‌هانگيره
ڕووشنايى ده‌يگن،وه گشت چراخه‌يل
بـجم : له سـه‌حرا، له سـاى باخه‌يل
***
به‌ڵكـى وه‌ى جووره ... بوينيدن ڕازد
يه‌كــه‌و بگرين و، بكيشـــى نازد
له كنار جوويگ، له سايه‌ى داريگ
بنيشيـد ئـازا و، گيـــان بايگه ئازد
به‌ڵكـى وه‌ى جووره... بوينيدن ڕازد
***
چ خوه‌شــه ديريد!! ڕازى له زنه‌ى
جوور سنده‌بـاد ....ت هايده منه‌ى
نــه جوور ئه‌نعام, ده‌روينى چووڵه
ئه‌را قه‌ســاوه‌يل ، بێ خه‌وه‌ر به‌نه‌ى
چ خوه‌شــه ديريد!! ڕازى له زنه‌ى