هاله يادد وه‌ختێ وتی: ورسگمه.. كوته نانێگ ڕه‌ق له‌ناو تويره‌كه‌گه‌م بوی، وه‌لدا برا به‌شی كردم؟!.. هاله هويرد وه‌ختێ تيه‌نگد بوی داپيره پشت چه‌مياگ و نوو چه‌وه شه‌هيده‌گه‌م جام جام دوو له مه‌شكه‌گه‌ێ ئه‌ڕاد داكرد؟!، له يادد چييه وه‌ختێ زوقمد بوی، برا پێشمه‌رگه‌گه‌م فه‌ره‌جيه‌گه‌ی وه‌ر خوه‌ی كه‌نی و كرده‌ی وه‌رد تا ڕه‌قده‌و نه‌وه‌يگ؟! .. نييه يادد وه‌ختێ ته‌ياره‌يل، ئاوايه‌گه‌مان بوردومان كردن و تووپه‌يل به‌عس، داڵگ و خوه‌شك و براگانم كرديانه ئامانج، تو له ڕخا گياند له‌رزياد، له سه‌نگه‌ره‌گه‌ی وه‌ر ماڵه خه‌رگينه‌گه‌مان جيد كرده‌مه‌و تا چه‌كه‌يل دوژمن له‌تله‌تد نه‌كه‌ێگ؟!!..، هاله يادد وه‌ختێ هه‌ڵه‌بجه‌ی شه‌هيدم وه‌گازه‌يل ره‌نگامه خنكانن، ئه‌را ئه‌وه‌گ نه‌خنكيه‌ی جه‌مه‌دانيه‌گه‌م ته‌ڕ كردم و به‌سامه‌ی ده‌مچه‌ود تا نه‌ويشن له شارێگ كوردنشين له غه‌ريبی مرد؟!! له هويرده‌و چييه وه‌ختێ دڵد ته‌نگ بوياد ئه‌را كه‌سوكارد، دڵدارييد ديام و وتيام تا ئاخر نه‌فس برادم؟!..
چه‌س ئمڕوو چه قوومياس؟!! قشون و ئوردی ئه‌را شار و ئاوايه‌گه‌م خه‌يده ڕێ، ئايا توای ياد رووژگاره‌يل كوردقڕان دوواره‌وه بكه‌ی؟؟ ، يا هايده ته‌ما كونه ئاوه‌گان دايه پيره‌گه‌ی جاران بسزنيد يا هه‌م له نوو ئشق چه‌مه‌نتوو كردن كانياوه‌گانم كرديده!!، بچوو بچوو سفڵه، من ڕێخ برايی وه‌لدا ناويمه چاڵ وه‌لی شه‌رت بوو ئه‌و ڕێخه وه تك كلگه زه‌خميه‌گانم ده‌ربكه‌م و حاشا له‌ليد بكه‌م و بويشم تو دی برام نييد و ئه‌گه‌ر ته‌مای نيشتمانم كرديده كوور خوه‌نيده‌و ئی ئاره‌زوو مه‌حاڵده وه‌ل خوه‌دا به‌يده قه‌ور.
ن: جه‌واد كازم مه‌ڵكشای
وێنه: سه‌رده‌م خه‌بات دژ وه‌ڕژيم به‌عس، نوری مالكی سه‌رۆك وه‌زيره‌يل عراق و حه‌سه‌ن سنێد ئه‌ندام په‌رله‌مان ئيسه‌ی عراق له‌وه‌ختێگ په‌نا ئه‌ڕا كوردستان هاوردوين.