بکیش چووپی کیش، چووپی ها ده‌سد
با به‌یوو نه‌‌وای ساز نه‌فه‌سد
دونیا ده‌ور ده‌وره، ئمرووژ ده‌ورده
یه‌ێ ڕووژێ گرن، چووپی وه‌ده‌سد
بار گرانی ها بان شانم
فه‌قر و فه‌ڵاکه‌ت بڕییه ئامانم
ئه‌ر په‌یدا بکه‌م ماڵ عزرائیل
ڕشوه ده‌مه پێ، بسێنێ گیانم
بشکن سقانم، ڕووژگار بشکن
بشکن، بێ مروه‌ت، سته‌مکار بشکن
بشکن ناو تــۊڵم که‌له‌ی سه‌ر بشکن
قه‌فه‌س سینه‌م تا که‌مه‌ر بشکن
بشکن قه‌ڵه‌مم، قه‌ڵمدان بشکن
غرورم ئه‌ڕای لوقمه‌ی نان بشکن
مه‌گه‌ر شکاندن شانازی دێرێ؟!
فه‌ڵه‌ک هه‌ر ساتێ سه‌د بازی دێرێ
بڕشن ساقی گیان جام مه‌ی بڕشن
ده‌ردم گرانه، په‌یتاپه‌ی بڕشن
بڕشن ساقی گیان، سا حه‌ڵاڵم که
خەیاڵ ها له سه‌ر، بێ خەیاڵم که
برشن ساقی گیان، کاسه‌گه‌د گڵ بوو
شه‌راود قرمز جوور خۊن دڵ بوو
ڕشن ساقی گیان، مه‌سی و ڕاسی
وه مه‌سی دۊنم خوداشناسی
بڕشن ساقی گیان وه‌ی مه‌ی حه‌رامه
من حه‌رام خوه‌رم، حه‌ڵاڵ خوه‌ر کامه؟!
شێعر : ئەسد چراغی