پەریشانم، پەریشانم، وڵم کە
دوچار دەرد پنهانم، وڵم کە!
وە دەردم ئاشنا کردی، نەکردی
ستەمگەر فکر دەرمانم، وڵم کە!
وڵم کە تا نەوەید کەس پەی وە دەردم
دو سێ ڕووژی کە مهمانم، وڵم کە!
نەکرد کەس دەعوەتم خوەم بیمە مهمان
وە کار خوەم پەشیمانم، وڵم کە!
حەمامە ئی سەرای سەرد و گەرمە
بساو کیسەیی وە ناو شانم، وڵم کە!
تەنم زانم نەسیب موور و مارە
نە موورم نە سولەیمانم، وڵم کە!
نە ساختِ من، وە فولادە نە وە سەنگ
هەف هەشت دە تیکە سوقانم، وڵم کە!
وە کامِ کەس نیەگەردد چەرخ تا سەر
نە دەرویشم نە سوڵتانم، وڵم کە!
وە واوەیلای دڵ هەر شەو ڕەوانە
سرشکِ غەم وە دامانم، وڵم کە!
خەرابم کرد خەرابات خەیاڵد
وە دەس چوود عەقڵ و ئیمانم، وڵم کە!
وە بادەێ تەڵخ جامِ زندەگانی
دەمێ مەست و غەزەڵخوانم، وڵم کە!
وە سەحرای خەیاڵ چون قەیس سانی
تو کردی وێڵ و وەیلانم، وڵم کە!
گوزەشت فەسڵِ بەهار و مووسمِ باخ
وە فکرِ لەرزِ زمسانم، وڵم کە!
لەوە ترسم بکیشێد کار وە هاوار
نەکەی کەس گوش وە ئەفغانم، وڵم کە!
وڵم کەید یا نیەکەید ڕەحمێ وە حاڵم
تەنم کردی وە زندانم، وڵم کە!
وە ئەرواح شەرەف سەوگەند کە دائم
مەلوول مەرگ وژدانم، وڵم کە!
شەرەف کوشیاد و وژدان جوانەمەرگ بی
وە بێ وژدانی حەیرانم، وڵم کە!
وە کام دوشمەن بووەم ئەی دووس! شکایەت؟
کە دووس بی قاتڵ گیانم، وڵم کە!
وڵم کە! وڵکەرد نیم سوو لە مەحشەر
تو کردی خار دەورانم، وڵم کە!
تو کردی بێ سەر و سامان شامی
وە مەولا خوەم قەشەنگ زانم، وڵم کە!
شاعێر : شامی کرماشانی(شاهمراد)