هه‌ناێگ گوڵاڵه
سه‌رمه‌سه‌و عاشق
له کۊه‌ی په‌ڕاو
بوڵبوڵ ناو دڵێ
ته‌کان نیه‌خوه‌ێ ئاو
هه‌ناێگ داڵاهوو
به‌رزه چۊ ئاهوو
جه‌م عرفانه
جفت خه‌زاڵ چه‌وێ
داره‌یل سه‌وڵێ
هه‌ناێگ ک چنۊر
تام زنه‌ی ده‌ێ
بێستۊن هه‌ر باس
له عشقه‌گه‌ێ که‌ێ
هه‌ناێگ ک سیروان
بێ‌ده‌نگ بێ‌ده‌نگێگ
باس یاری که‌ێد،
ئاو ئه‌ڵوه‌ن داستان
عاشقه‌ێل به‌ێد و
پرشنگ له خوه‌ر خه‌ید
هه‌ناێگ پیرموسی
توپه‌یل وه‌ده‌مه‌و
گشتێ ته‌ره‌کنێد
هه‌ناێگ له ناو ِدکان ِ داوه‌و
ده‌نگ ِ سه‌ر ته‌رزێگ
گووش ِ ئی دنیا
گشتێ لاونێد
هه‌ناێگ به‌ڕۊسان
پاداسه گه‌زو
هه‌رگز نیه‌چه‌میه‌ێد
هه‌ناێگ ده‌ر قاپی
قه‌ره‌سرد وازه‌و من
نیشمه تماشاێ
تاریخ ِ خوه‌مه‌و
هه‌ناێگ هانیتا
چڕێد و ئۊشێد
بچیم تا قه‌سڵان
قومێگ ئاو بخوه‌یم
هه‌ناێگ تاق وه‌سان
ئه‌سبه‌گه‌ێ زینه‌و
چووده شکار ئه‌‌هریمه‌نه‌ێل گه‌ن
هه‌ناێگ تۊشامی
بووده ته‌ک کتاو
ده‌رس عاشقی
من نیشمه ژێر
ساێه‌ڕ ێه‌ێ دارێگ
وه‌ده‌نگ به‌رزێگه و
کیشم هاوارێگ :
تو چه‌نێ گه‌وراید
ئه‌ێ نیشتمانم
چه‌نێ گه‌وهه‌ر ناز
خه‌یده ژیانم....
له سه‌ر کۊه‌یلد
گوڵ گوڵ روشنای
ترۊسکه ێان تێه‌ێد
ئه و ترۊسکه ێله
ئاواته ێلمن
دڵخوه شی گیان و زنده‌گانیمن ....
دڵخوه‌شی گیان و زنده‌گانیمن ...