كه‌وك خوه‌ش كه‌لام له قوله‌ى كه‌مه‌ر
چڕى ئه‌و پيمان وه‌ت له كه‌له‌ى سه‌ر:
هريڵسن له خه‌و ياران كشمات
مزيانى بيه‌ن له نوو خوه‌رهه‌لاَت
كه‌پوو وه نازه‌و نه‌رمه په‌رواز كه‌ى
گوڵ خه‌نان له شه‌وق خوه‌ر ده‌مى واز كه‌ى
هه‌ناى گوڵ خه‌نى و وه‌ڵنگ له په‌ل دار
م چوى بنيشم كز و كوور و ژار
***
ئيواره وه‌خته زه‌وى ليَڵه گرتيه
مه‌ل و په‌له‌وه‌ر گشت ليزه گرتيه
زه‌رده‌ى خوه‌ر بڕياس له ڕوى كه‌وره‌گان
پاسه‌وان شه‌و له كه‌ل هاته‌و بان
كه‌وك خوه‌ش كه‌لام كشمات و بى ده‌نگ
ولاَت پووشايه خه‌لاَت يه‌ى ڕه‌نگ
شه‌مشه‌مه‌كووره‌ك وه باڵ بى په‌ڕ
جاى په‌روازيه له سايه‌ى بى خوه‌ر
م ته‌نيا نيشم وه مراده‌وه
سفيده‌ى سه‌حه‌ر له نوو بايده‌وه
ليسك خوه‌ر بيه‌ى له شاخه‌ى داران
كه و بشاقنى له سه‌ر نساران