لە بن دنیاێ دۊرەو تیەم

لە تیەریکی بێ نۊرەو تیەم

لە وڵات خاپۊرە تیەم

هلوور ملوور دەنگ بلوور

لە پاێ دار بەرز کولوور

خوەراواسەو زام ناسوور

نیشم ، ئۊشم ، گیرم ، خەنم

تووژێگ لە رۊ دنیا کەنم

دنیا ڕنگ و ڕەیشتانەسە

باقی واتەو ئەوسانەسە

دەسەیل پڕ مەکر و دەسان

بنیاێ دنیا وە هۊچ بەسان

رێوار قەێ تاش بێ ڕێ

شیشەێ ئومر دنیا ها پێ

هلوور ملوور دار واێەم

شنەێ وا تێ ونەێ ئاێەم

ئاێەم چوود و ونەێ مینێ

نەقشێ لە قەێ زنەێ مینێ

ئاێەم کەپوو پایزانە

وەیلان ڕۊ جادەگانە

شەو سەردێ زاناێ شەکەت

مرد و ڕاز ئاڵەم نەوەت

هلوور ملوور مەلەوەرێ

پایزەو لە کەلەوەرێ

لە ژێر دار بێ بەرێ

نیشم ، ئۊشم ، گیرم ، خەنم

لە سەد مەقام بلوور ژەنم

بلوور دەنگ ئەژدادمە

دادم نییە بێدادمە

 بانان