● رودوس فەیلی "مصطفی بیگی"
خوەم دۆرم و خوەت دۆر وە دۆری قەسەم ئمشەو
ها دەێ گەل و هووزە، هە چمان بێ‌کەسەم ئمشەو
تا دوینمەت ئاخینمە داخینمە ئەی مانگ
ئی عشقە زەمینی بکە خوەت، تا هەسەم ئمشەو
سەد جار م هانا وە تو هاوردم و هەر هیچ
هەر تامەزروودارە وە هاناڕەسەم ئمشەو
بێ‌دەنگی و بێ‌ڕەنگ و م پڕ کەڵکەڵە و ئاگر
هەم پڕ لە خوسە پڕ قسە، وەسوەسەم ئمشەو
ئمشەو چەنێ خوەم خوازمەت ئمشەو چەنێ تەنیام
ئاسارە زلەی بەختە هەلەم، گشت‌کەسەم ئمشەو
ئیجوورە ک ئیجارە دە ئی جامە تو دیمە
گرد ئەڵقوڕنم خوەم، خوەت و مەی، بەدمەسەم ئمشەو
هاوار ک ئەوشارییەوە خوەت لە قەپ م
قەپ قەپ بوێ ئەو لارتە وەرد جەسەم ئمشەو
هووکت بجمێ خوەت بەسمی وەر نە وە تەنیا
بێکەس وە خوەم‌ئای، بێکەس و دەس، بێ‌دەسەم ئمشەو
وی‌وی بچی و تۆش شەڕ عشقێ بیایتەو
تا ئەوڕەسی ئەر عاشقێ وت: ئەوڕەسەم ئمشەو